Murati – Leka: Komuna e Gjilanit, ka pasur rritje të buxhetit mbi 8 milionë euro
Mbi 8 milionë euro ka pasur rritje të buxhetit Komuna e Gjilanit në vitin 2023 nê krahasim me vitin paraprak. Derisa si burimi kryesor i të hyrave ishin nga tatimi në pronë, lejet ndërtimore, gjeodezia e sektorë tjerë.
Drejtoresha për Buxhet dhe Financa e Komunës së Gjilanit, Herolinda Murati – Leka, tha se buxheti në planifikimin fillestar për vitin 2023, ishte 32 milionë e 599 mijë e 280.87 euro. Ndërsa përfundimtari ishte 37 milionë e 495 mijë e 73.20 euro. Sipas saj, buxheti i shpenzuar ishte 34 milionë e 111 mijê e 198.06 euro.
“Po të shohim trendin nga analiza krahasimore mes vitit 2022-2023 do të vijmë në përfundim se kemi rritje të buxhetit për 8 milionë e 250 mijë e 265. 49 euro, apo 28. 2% më shumë se në vitin 2022”, tha Herolinda Murati – Leka.
Drejtoresha për Buxhet dhe Financa, më tej shtoi se në vitin 2022, buxheti përfundimtar ishte 29 milionë e 244 mijë e 807. 71 euro. Ajo tregoi se realizimi i të hyrave më 2023 ishte 7 milionë e 469 mijë e 825. 73 euro.
Herolinda Murati – Leka, poashtu theksoi se burimi kryesor i të hyrave ishte nga tatimi në pronë e ku janë realizuar 3 milionë e 88 mijë e 495. 14 derisa ishin të planifikuar 2 milionë e 938 mijè e 283 euro.
“Burime të rëndësishme të realizimit të të hyrave vetanake të Komunës për vitin 2023 ishin edhe nga lejet ndërtimore, gjeodezia e sektorë tjerë”, shtoi drejtoresha për Buxhet dhe Financa.
