Mediat: Dita e Flamurit “thyen” akullin, bashkon Ramën me Kurtin në Vlorë
Dita e Flamurit duket se ka thyer “akullin” në raportet mes kryeministrit Edi Rama dhe kryeministrit të Kosovës, Albin Kurti, të cilët janë bërë bashkë në Vlorë.
Ata kanë qenë të pranishëm në ceremoninë simbolike të ngritjes së flamurit kuqezi në Vlorë. Bashkë me ta ka qenë edhe Presidenti i Republikës, Bajram Begaj dhe kryetarja e Kuvendit Lindita Nikolla.
Pas ceremonisë së ngritjes së flamurit, liderët e shtetit shqiptar, bashkë me Kryeministrin e Kosovës kanë vendosur kurora me lule në memorialin e Pavarësisë në Vlorë. Më pas Begaj, Rama, Kurti dhe Nikolla janë takuar me qytetarët që ishin të pranishëm në këtë ceremoni.
Shqipëria festoi dje 111 vite nga krijimi i shtetit. Më 28 Nëntor 1912, Ismail Qemali ngriti flamurin në Vlorë duke shpallur Shqipërinë shtet sovran dhe të pavarur.
28 Nëntori njihet ndryshe edhe si Dita e Flamurit, një ditë e rëndësishme për mbarë shqiptarët në trevat shqiptare dhe anembanë botës.
