Malisheva debuton me fitore në Ligën e Konferencës, mposht ekipin e Malit të Zi me super golin e Brrutit
Malisheva ka debutuar me fitore në Ligën e Konferencës, duke mposhtur 1-0 Buducnostin, përkatësisht në 1/8 e finales kualifikuese për në fazën e grupeve të garës.
Ndeshja nisi me një ritëm të kujdesshëm nga të dyja skuadrave, ndërsa në këtë mund të ketë ndikuar edhe temperaturat e larta që po mbretërojnë në vendin tonë, pasi ndeshja po luhet në stadiumin “Zahir Pajaziti” në Podujevë.
Malisheva doli përpara me Drilon Hazrollajn, por që skuadra malazeze e ka studiuar shumë mirë lojën e yllit malishevas duke e markuar çdoherë me nga dy lojtarë.
E njëjta gjë mund të thuhet edhe për Sobowalen, që sa herë pranonte topin, dyfishohej nga lojtarët e Buducnostit.
Edhe skuadra kundërshtare kishte rastet e saja, duke rrezikua me anë të Perisic dhe Ivanovic, por që Veliu ishte i sigurt me pritjet e tij.
Goal: Etnik Brruti | FC Malisheva 1-0 FK Budućnost pic.twitter.com/jwWquTsHnv
— PushGoals (@PushGoals) July 11, 2024
Malisheva e nisi mirë pjesën e dytë, duke realizuar më pas edhe golin e epërsisë.
Ishte Etnik Brruti, ai që realizoi një super gol nga distanca për të kaluar malishevasit në epërsi 1-0.
Malishevasit kishin më pas disa rastet të mira për të dyfishuar epërsinë, mirëpo lojtarët e ekipit malazez bënë ndërhyrje të palejueshme, duke pranuar kartonë të verdhë.
Padyshim që ky rezultat e ndihmon shumë Malishevën për ndeshjen e dytë ndaj Buducnostit, duke shpresuar që të kalojnë në rrethin tjetër të Ligës së Konferencës.
