Lufta me tarifa, Donald Trump: Kemi marrëveshje me Kinën
Presidenti i Shteteve të Bashkuara të Amerikës Donald Trump njoftoi sot në rrjetin social Truth Social se është arritur një marrëveshje me Kinën, duke deklaruar se Pekini pranon të furnizojë minerale të rralla dhe magnete paraprakisht, ndërsa Uashingtoni do të përmbushë detyrimet e veta, duke përfshirë lejimin e studentëve kinezë të përdorin kolegjet dhe universitetet amerikane.
Trump tha Shtetet e Bashkuara të Amerikës kanë siguruar tarifa prej pesëdhjetepesë për qind, ndërsa Kina do të paguajë dhjetë për qind. Ai shtoi gjithashtu se “marrëdhënia me Kinën është e shkëlqyer” dhe se marrëveshja është ende në pritje të “miratimit përfundimtar nga ai dhe presidenti Xi”.
Më dy prill të këtij viti, Trump shpalli “Ditën e Çlirimit” të politikës tregtare amerikane, duke njoftuar futjen e një tarife universale prej dhjetë për qind për të gjitha importet, me tarifa shtesë, dukshëm më të larta për vendet që administrata e tij i ka etiketuar si “akterë të këqij” në tregti.
Kina u godit nga tarifa shtesë të cilat, përveç masave të mëparshme, rritën normën totale të tarifës për produktet kineze në pesëdhjetekatër për qind. Trump e cilësoi iniciativën si një “deklaratë të pavarësisë ekonomike”, duke pretenduar se do të nxiste prodhimin vendas dhe do të zvogëlonte deficitin tregtar të Shteteve të Bashkuara të Amerikës.
Vetëm pas një jave, përballë presionit nga tregu dhe komuniteti i biznesit, Trump njoftoi një pezullim tremujorë të shumicës së tarifave të reja, megjithëse tarifa bazë prej dhjetë për qind dhe masat shtesë kundër Kinës mbetën në fuqi.
Megjithatë, pas negociatave diplomatike në Gjenevë, SHBA-të dhe Kina ranë dakord për një ulje të përkohshme të tarifave.
Të dyja palët ranë dakord për një ulje tremujore të tarifave, me Shtetet e Bashkuara të Amerikës që uli tarifat për produktet kineze nga njëqindedyzetepesë në tridhjetë për qind dhe Kinën që uli tarifat për produktet amerikane nga njëqindenjëzetepesë në dhjetë për qind./KosovaPress/
