Legjenda e portës, Xhemal Zeqiri, merr rol të ri në përfaqësuesen U20 të Maqedonisë
Ish-portieri i njohur i shumë klubeve shqiptare në rajon, Xhemal Zeqiri, ka marrë një detyrë të re në karrierën e tij si trajner. Me vendim të Federatës së Futbollit të Maqedonisë së Veriut, ai është emëruar ndihmësseleksionues i përfaqësueses U20 të këtij vendi.
Zeqiri konsiderohet një nga portierët më të dalluar të gjeneratës së tij, duke zhvilluar një karrierë të pasur në disa klube të njohura, si Kumanova, Prishtina, KNI “Ramiz Sadiku”, Liria, Drita, Ballkan Stokokomerc, FCU, Shkëndija e Haraçinës dhe në disa skuadra të tjera në rajon. Gjatë karrierës së tij ai u dallua për përvojën, sigurinë në portë dhe lidershipin në skuadrat ku ka luajtur.
Pas përfundimit të karrierës aktive si futbollist, Zeqiri iu përkushtua punës në zhvillimin e futbollistëve të rinj dhe edukimit sportiv, duke fituar përvojë të vlefshme në aspektin profesional dhe pedagogjik.
Në rolin e ri në përfaqësuesen U20 të Maqedonisë së Veriut, pritet që përvoja e tij e gjatë në futboll të jetë një ndihmë e rëndësishme në zhvillimin dhe përgatitjen e talenteve të rinj, të cilët synojnë të bëhen pjesë e së ardhmes së futbollit në këtë vend.
Grumbullimi i parë i përfaqësueses U20 me stafin e ri teknik do të mbahet më 10 mars, ku Zeqiri do të nisë zyrtarisht detyrën e tij, në prag të ndeshjes miqësore që kjo përfaqësuese do ta zhvillojë ndaj Lihtenshtajnit.
Emërimi i tij në këtë post konsiderohet një hap i rëndësishëm në karrierën e tij si trajner, ndërsa pritjet janë që përvoja dhe përkushtimi i tij të kontribuojnë në zhvillimin e gjeneratave të reja të futbollistëve.
