La Gjermaninë për Kosovën – Kirurgu Kushtrim Qerimi ligjëron në Velekincë
Shkolla “Mulla Idriz Gjilani” në Velekincë priti sot kirurgun e njohur gjilanas, Kushtrim Qerimi, i cili mbajti një ligjëratë vetëdijësuese për nxënësit – raporton TV Gjilani.
Ai la Gjermaninë, bashkë me luksin dhe komoditetin, për t’u kthyer e për të shërbyer në vendlindje.
Përmes përvojës së tij profesionale dhe jetësore, dr. Qerimi ndau me nxënësit mesazhe të rëndësishme për përkushtimin, punën e palodhshme dhe rëndësinë e arsimimit në arritjen e suksesit.
Drejtori i shkollës, Zaim Zymeri, vlerësoi lartë vendimin e tij për t’u kthyer dhe kontribuar në vendin e tij, duke shtuar se ky gjest shërben si shembull i fuqishëm për brezat e rinj.
Nxënësit patën mundësinë të bashkëbisedojnë, të shtrojnë pyetje dhe të marrin këshilla të vlefshme për rrugëtimin e tyre në të ardhmen.
Në fund, në shenjë falënderimi, shkolla i ndau mirënjohje dhe një pikturë të punuar nga nxënësit për dr. Qerimin, për kohën, përkushtimin dhe motivimin që u dha.
