Koncert artistik me flaut dhe piano në Shkollën e Muzikës në Gjilan
GJILAN – Në ambientet e Shkollës së Muzikës në Gjilan është mbajtur koncerti artistik “Flaut & Piano”, i cili solli para publikut interpretime të veprave të përzgjedhura nga repertori i muzikës klasike.
Në koncert u paraqitën profesoreshat e flautit, Turkane Latifi dhe Ardiana Ismaili, si dhe profesori i pianos, Premtim Selimi, të cilët interpretuan një program të larmishëm artistik, duke dëshmuar përkushtimin e tyre në fushën e edukimit dhe interpretimit muzikor. Pjesë e mbrëmjes artistike ishin edhe nxënësit e klasave të profesorëve pjesëmarrës, të cilët u prezantuan me interpretime në flaut dhe piano.
Sipas organizatorëve, paraqitjet e tyre pasqyruan punën dhe përgatitjen e vazhdueshme gjatë procesit mësimor, si dhe zhvillimin e tyre artistik.
Publiku i pranishëm pati rastin të ndjekë një program të pasur koncertal, ku flauti dhe pianoja u ndërthurën në interpretime që krijuan një atmosferë të veçantë artistike.
Nga Shkolla e Muzikës në Gjilan vlerësojnë se aktivitete të tilla shërbejnë si mundësi për promovimin e talentit të nxënësve, afirmimin e punës pedagogjike dhe pasurimin e jetës kulturore në qytet.
