KEDS: Nesër fillon shkyçja e bizneseve pa kontratë furnizimi me energji elektrike
Kompania Kosovare për Distribuim të Energjisë Elektrike (KEDS), ka bërë të ditur se nesër, më 31 korrik 2025, do të fillojë zbatimin e vendimit të Zyrës së Rregullatorit për Energji (ZRRE) për bizneset që janë pjesë e tregut të lirë të energjisë elektrike.
Sipas ligjit dhe rregullave në fuqi, shërbimi i Furnizuesit të Mundësisë së Fundit (FMF) është i kufizuar në një periudhë maksimale prej 60 ditësh. Pas përfundimit të kësaj periudhe, bizneset që nuk kanë lidhur një kontratë të rregullt furnizimi me një furnizues aktiv nuk do të mund të furnizohen më me energji.
Prandaj, sipas njoftimit, KEDS është i detyruar të shkyçë nga rrjeti të gjithë ata konsumatorë komercialë që nuk kanë marrëveshje të vlefshme furnizimi, për të ruajtur funksionimin dhe sigurinë e sistemit energjetik.
“Sipas Nenit 39 të Ligjit për Energjinë Elektrike (Nr. 05/L-085) dhe Rregullës për Furnizuesin e Mundësisë së Fundit (FMF), shërbimi i FMF-së është i kufizuar në një periudhë maksimale prej 60 ditësh. Pas përfundimit të kësaj periudhe, në mungesë të një kontrate të rregullt furnizimi, dhe në përputhje me Nenin 8 të Rregullës për Ndërrimin e Furnizuesit, vazhdimi i furnizimit me energji elektrike nuk lejohet ligjërisht, dhe për të ruajtur integritetin e sistemit energjetik, është e nevojshme të bëhet shkyçja. Bazuar në këto obligime ligjore të përmendura më lart, KEDS nesër, më 31.07.2025, është i obliguar të shkyçë nga rrjeti të gjithë konsumatorët që aktualisht nuk kanë një marrëveshje të rregullt furnizimi me një Furnizues Aktiv”, thuhet në njoftimin eKEDS-it.
Kompania sqaroi se roli i saj është vetëm shpërndarja e energjisë elektrike dhe nuk ka kompetenca për furnizim, por është e detyruar të zbatojë vendimet e ZRRE-së.
Aktualisht, në kuadër të procesit të liberalizimit të tregut të energjisë elektrike në Kosovë, kompanitë që kanë mbi 50 punëtorë ose qarkullim vjetor mbi 10 milionë euro janë të detyruara të kalojnë në tregun e hapur të energjisë. Kjo nënkupton që ato duhet të lidhin kontratë furnizimi me një furnizues të licencuar, duke përfituar çmime që formohen lirshëm nga kërkesa dhe oferta në treg.
Për kompanitë që ende nuk kanë lidhur një marrëveshje të tillë, Korporata Energjetike e Kosovës (KEK) po ofron furnizim përkohësisht si Furnizues i Mundësisë së Fundit (FMF).
Ky furnizim është një zgjidhje emergjente, i kufizuar në një periudhë prej 60 ditësh, dhe ka çmime më të larta se ato mesatare të tregut. Afati i kësaj periudhe 60-ditore skadon sot, duke shtuar presionin ndaj bizneseve për të siguruar kontrata të rregullta me furnizuesit e licencuar.
