Katër gola dhe nuk ka fitues, Barca dhe Unitedi luajnë baras
Barcelona dhe Manchester Unitedi kanë luajtur baras (2-2) në ndeshjen e parë të ‘play-offit’ në Ligën e Evropës.
Wout Weghorst shfrytëzoi një pasim të humbur në zonë për të goditur drejt portës, por intervenimi i Marc-Andre ter Stegen ia pamundësoi golin.
Tjetër mundësi për mysafirët në pjesën e parë pati Marcus Rashford, i cili e kontrolloi mirë topin dhe gjuajti drejt portës, por sërish në vend ishte Ter Stegen për një tjetër pritje të shkëlqyer.
(Foto: Twitter/Manchester United)
Jordi Alba pati një prej mundësive më të mira për vendasit në fraksionin e parë, por David de Gea nuk e lejoi të shënonte dhe skuadrat shkuan në pushim me rrjetat e paprekur.
Me të filluar pjesa e dytë (50’), rezultati u zhbllokua. Raphinha harkoi nga këndi dhe më së larti kërceu ish-futbollisti i Chelseat, Marcos Alonso, për t’ua dhënë epërsinë Blaugranëve.
(Foto: AFP/Getty)
Por, i menjëhershëm ishte reagimi i Djajve të Kuq. Pas një kundërsulmi të shpejtë, Fred asistoi për mrekulli te Marcus Rashford, i cili ishte i saktë për t’i barazuar shifrat (53’).
Përmbysja nga vizitorët ishte e shpejtë. Një top të dërguar në zonë e dërgoi gabimisht në portën e tij Jules Kounde (59’).
Një kombinim i mirë ndërmjet Kounde dhe Raphinha, bëri që ky i fundit të dilte në shans dhe ta barazonte rezultatin (76’).
