Kanadaja zotohet të ndihmojë vendet që s’po përdorin më naftën ruse, por a mund t’ia dalë?
Ndërsa çmimet janë rritur si rezultat i shtrëngimit të furnizimeve ruse për shkak të pushtimit të Ukrainës, Kanadaja thotë se mund të sigurojë më shumë naftë, gaz dhe uranium për të ndihmuar në zgjidhjen e krizës globale të energjisë.
Prodhuesi i katërt më i madh i naftës në botë është zotuar të eksportojë 200,000 fuçi naftë shtesë. Ministri i saj i Burimeve Natyrore, Jonathan Wilkinson tha për BBC News se do të eksportonte gjithashtu 100,000 fuçi gaz natyror shtesë.
Megjithatë, kjo është vetëm një pjesë e vogël e tre milionë fuçive në ditë që IEA (Agjencia Ndërkombëtare e Energjisë) thotë se do të hiqen nga tregjet globale deri në muajin e ardhshëm për shkak të sanksioneve kundër Rusisë.
Kanadaja është e kufizuar në sasinë e naftës që mund të eksportojë, sepse tubacionet e saj funksionojnë afër kapacitetit të plotë, por Wilkinson thotë se dërgimi i saj nëpërmjet Shteteve të Bashkuara është një opsion.
Kompania më e madhe kanadeze e gazsjellësit, Enbridge i tha BBC-së se është e përgatitur të bëjë atë që mundet për të rritur sigurimin e energjisë si për Amerikën e Veriut, ashtu edhe për Evropën.
Ndikimi i furnizimeve shtesë të Kanadasë “do të jetë relativisht i kufizuar duke pasur parasysh rajonalitetin e naftës së papërpunuar kanadeze, e cila ka të ngjarë të qëndrojë në tregun e Amerikës së Veriut”, sipas Louise Dickson, e cila është një analiste e lartë e naftës në konsulencën Rystad Energy.
