Kamenica bëhet me orkestër frymore
Për herë të parë, “Orkestra Frymore Kamenica” do të performojë të marten në Kamenicë, duke sjellë një eksperiencë unike për qytetarët e Komunës së Kamenicës, shkruan Tv Gjilani..
Koncerti do të mbahet në vigjile të Festës së Flamurit, më 26 nëntor 2024, në ora 14:00, në Shtëpinë e Kulturës – Kamenicë.
“Ky është një moment historik për jetën kulturore të qytetit, duke theksuar rëndësinë e muzikës frymore si pjesë e trashëgimisë artistike dhe muzikore”, njofton faqja zyrtare e Komunës së Kamenicës.
Me këtë rast faqja e komunës fton qytetarët të jenë pjesë e këtij koncerti, i cili mbase do të hyjë në analet e historisë së fushës muzikore, marrë parasysh faktin se tanimë kjo komunë gradualisht ka krijuar kuadrot e saj të profesionalizuara, të cilët do ta mbajnë mbi supet e tyre “barrën” artistike dhe të ardhmen kulturore.
“Mos e humbisni këtë rast për të shijuar tingujt e veçantë dhe talentin e muzikantëve lokal. Ju mirëpresim të gjithëve!”, shkruan faqja e Komunës, percjell Tv Gjilani.
