Igball Jashari shënoi hat-Trik, Drenica promovohet në Albi Mall Superligën e Kosovës për edicionin 2024/2025
Të shtunën janë zhvilluar ndeshjte e javës 26-të, të parafundit në Raiffeissen Ligën e Parë për edicionin 2024/2025, të cilat kanë sjellur rezultate të pritshme, shkruan TV Gjilani.
E vecanta e kësaj jave ishte fakti se skuadra e Drenicës, është promovuar drejtpërdrejtë si lidere e tabelës, pasi ka shënuar fitore meritore (3:1) ndaj Istogut, duke krijuar kësisoji distancë të mjaftueshme pikësh (55), kundruall përcjellësit të saj, Liria nga Prizreni (48), kur ka mbetur vetëm një xhiro për t’u zhvilluar deri në fund të këtij edicioni në këtë rang garash.
Të tre golat për skuadrën e Drenicës i ka shënuar nipi i Komandantit Legjendar Adem Jashari, ish futbollisti i Prishtinës – Igball Jashari, i cili këtë sezonë u kthye në vendlindje për ta ndihmuar Drenicën në këtë rrugëtim aspak të lehtë.
Këtë sukses të Drenicës e kanë përshëndetur dhe uruar shumë akterë futbolli e sporti në tërësi, si dhe klube të ndryshme, të cilat e kanë cmuar lart përkushtimin dhe sakrificën e skuadrës, në këtë rikthim aspak të lehtë në elitën e futbolliit të Kosovës.
Njëri nga ta ishte edhe vet ministri i MKRS-së, z. Hajrullah Ceku, i cili vuri theksin te kontributi i kryetrajnerit Bylbyl Sokoli (“!”) dhe golëshunuesit, Igball Jashari.
“Dje, KF Drenica nën udhëheqjen e kryetrajnerit Bylbyl Sokoli ka hyrë në Superligë. Në fitoren e djeshme, të tri golat e Drenicës i shënoi Igball Jashari, nipi i Adem Jasharit. I urojmë gjithë qytetarët e Skënderajt e Drenicës dhe po ashtu Profën tonë për këtë sukses të arritur”, shkroi në faqen e tij, ministri Ceku./Tv Gjilani/
