“I kthehen vendlindjes: gjithnjë e më shumë kroatë nga mërgimi rikthehen në shtëpi”
Në Kroaci, gjatë tre viteve të fundit, janë kthyer rreth 30 mijë kroatë që më herët jetonin dhe punonin jashtë vendit – tregojnë të dhënat e Entit Shtetëror të Statistikave.
Pas kthimit, shumica hapin biznese në fushën e ndërtimtarisë, shërbimeve dhe profesioneve teknike, duke përfituar nga masa dhe programe të posaçme për të kthyert.
Rritet numri i të punësuarve dhe i të kthyerve
“Diskutonim që të hapnim një kafene ose restorant tonin. Kjo na nxiti. Bashkëshortja ime madje donte të vinte një vit më herët, sepse kurrë nuk kishte jetuar jashtë Irlandës dhe donte të njihte një kulturë e mënyrë tjetër jetese,” thotë Matej Vrdoljak, i cili kishte kaluar 12 vitet e fundit jashtë vendit – një vit në Kanada dhe që nga viti 2014 në Irlandë, ku edhe njohu bashkëshorten, Kate. Para një viti e gjysmë, ata lanë Dublinin për t’u vendosur në Osijek.
Matej kishte punuar për vite në gastronomi, ndërsa pas kthimit, bashkë me gruan, hapi një lokal të ushqimit të shëndetshëm.
“Nuk mund ta besonim. Ishim jashtëzakonisht të lumtur, sepse ai kaloi një pjesë të madhe të jetës larg nesh. Plot njëmbëdhjetë vite nuk jetoi me ne, dhe nuk ka lumturi më të madhe për prindërit,” tregon nëna e Matejit, Marijana Vrdoljak, për HRT.
Kostoja e jetesës, arsye kryesore për kthim
Nga Gjermania, para një viti u kthye edhe Dragica Kolarević, e cila kishte jetuar dy vjet atje duke punuar në administratë.
“Më mungonte familja, por edhe kostoja e jetesës sa vinte e rritej,” tregon Kolarević. “Banesa të shtrenjta, shërbime të shtrenjta… kur i llogarita të gjitha, e pashë që nuk ia vlente të lija gjithçka këtu.” Ashtu si Matej, edhe ajo pas kthimit hapi një biznes privat.
Mbështetje për të kthyert
Në këtë drejtim ndihmon edhe masa për vetëpunësim “Zgjedh Kroacinë”, e cila zbatohet nga Zyra Kroate e Punësimit. Deri tani, nga kjo kanë përfituar mbi 1100 të kthyer.
“Përfituesit që kthehen nga jashtë këtë vit mund të marrin deri në 27 mijë euro. Ndërsa për ata që zhvendosen brenda vendit, shuma arrin në 23 mijë euro,” shpjegon Ivana Mehle, zëvendësdrejtore e HZZ-së.
Nga Ministria e Demografisë theksojnë se për të kthyert ka edhe masa të tjera: përjashtim nga tatimi mbi të ardhurat për pesë vjet, si dhe programe për strehim.
“Me projektligjin për strehimin në zonat e mbështetura, edhe kroatëve që kthehen u mundësohet qasje në fondin e banesave, çka është një hap shumë i rëndësishëm,” tha Ivana Perkušić, drejtore e Departamentit për Migracion në Ministri.
Sipas të dhënave zyrtare, çdo vit në Kroaci kthehen rreth 10 mijë kroatë nga diaspora.
Burimi i lajmit: Index.hr
