Hamza: PDK-ja është gjithmonë e gatshme për zgjedhje

Kandidati i Partisë Demoratike të Kosovës, Bedri Hamza, ka qëndruar të mërkurën për vizitë në Prizren, ku u takua me të parin e kësaj komune që vjen nga partia e tij, Shaqir Totaj, përcjell Reporteri.net.

Hamza tha se PDK-ja, e cila ka dalë e para në zgjedhjet lokale, ka qenë dhe sipas tij është çdo herë e gatshme për zgjedhje të reja.

“Vendit do t’ia ofrojmë një qeveri kompetente, të përgjegjshme para qytetarëve dhe aleatëve tanë, me një program konkret, të realizueshëm dhe me indikatorë të matshëm, të cilin do ta prezantojmë gjatë muajve të ardhshëm”, shkroi Hamza në Facebook.

Më tej, ai tha se ndryshimin në Kosovë do ta bëjnë me çdo qytetar “që është lodhur nga kjo gjendje e pashpresë dhe dëshiron një jetë më të mirë këtu”.

Diskutimet për zgjedhje, megjithatë, duket se janë heshtur javëve të fundit.

Në anën tjetër, kryeministri i Kosovës, Albin Kurti, ka mbajtur një fjalim para strukturave të Lëvizjes Vetëvendosje javë më parë, ku ka thënë se në vitin 2025 do t’i fitojnë dy palë zgjedhje, ato parlamentare si dhe ato lokale.

Gjatë fjalimit Kurti përmendi opozitën, duke pretenduar se “s’mund t’i shtyjnë zgjedhjet pafundësisht”.