Haliti: Brenda një jave u shënuan tri raste të thyerjeve dhe vjedhjeve në shkollat e Vitisë
Pasi u vodhën 11 laptopë, 1 projektor dhe një zmadhues zëri në një shkollë të Komunës së Vitisë, ka reaguar Sokol Haliti, kryetari i Komunës.
Ai është shprehur i shqetësuar për këto raste, ndërsa ka deklaruar se vetëm brenda një jave janë shënuar tri thyerje dhe vjedhje në tri shkolla të ndryshme.
“Ftoj organet kompetente që të punojnë në zbardhjen e plotë të rasteve dhe ju bëjë thirrje të gjithë qytetarëve që kanë informacione lidhur me këto raste të njoftojnë organet kompetente, me qëllim që përgjegjësit të dalin para organeve të drejtësisë.” – thuhet në njoftimin e Komunës së Vitisë, më 12. 01. 2026.
Haliti ka thënë se Komuna e Vitisë pritet të bëjë së shpejti evidentimin e plotë të të gjitha dëmeve të shkaktuara dhe do të merren masat e nevojshme për sanimin dhe kompensimin e tyre, në mënyrë që procesi mësimor të vazhdojë në mënyrë të rregullt.
“Komuna e Vitisë u bën thirrje qytetarëve që të tregojnë përgjegjësi dhe të kontribuojnë në mbrojtjen e institucioneve tona publike, veçanërisht shkollave, të cilat janë pasuri e përbashkët dhe themel i së ardhmes së fëmijëve tanë. Çdo veprim që dëmton këto institucione dëmton drejtpërdrejt komunitetin tonë.” – është theksuar në njoftim.
KALLXO.com raportoi për vjedhjen e 11 laptopëve, 1 projektori dhe një zmadhuesi të zërit në Shkollën Fillore të Mesme të Ulët “Dëshmorët e 5 Prillit” në fshatin Smirë të Komunës së Vitisë. Ngjarja ka ndodhur më 06.01.2026.
Lajmin e konfirmoi për KALLXO.com, Ismet Hashani, zëdhënësi i Policisë për rajonin e Gjilanit, i cili tha se rasti është raportuar nga drejtoria e shkollës më 08. 01. 2026.
Sipas deklarimit të drejtorisë së shkollës, të dyshuarit kanë depërtuar me forcë nga kabineti i informatikës.
“Njësitet e hetimeve dhe njësia forenzikes kanë dalë në vendin e ngjarjes dhe me vendim të prokurorit, rasti i cilësuar “Vjedhje e rëndë” është duke u hetuar nga hetues policor stacioni i Vitisë.” – ka thënë Hashani, më 12.01.2026.
Arta Ajeti, ushtruesja e detyrës së Drejtorit të Arsimit në Viti tha për KALLXO.com se Shkolla “Dëshmorët e 5 Prillit” ka pasur edhe sistem të kamerave, por ka treguar se “në momentin që janë hyrë persona të paautorizuar e kanë marrë edhe kutinë ku ruhen të dhënat [pamjet ]e kamerave, atë e kanë hjek fillimisht, pastaj ka fillu demolimi.” – ka thënë ajo.
“[Të dyshuarit] Kanë hyrë nga dritaret, d.m.th xhamat janë të thyerë dhe kemi mungesë të 11 llaptopëve… Ka dëmtime ashtu të dyerve, mirëpo më së shumti fokusi i tyre ka qenë në teknologji.” – tha Ajeti, më 12. 01. 2026.
