Hajnat thyejnë xhaminë “Sinan Katibi” në Prizren, vjedhin të gjitha paratë nga arka e bamirësisë
Xhamitë në qytete të ndryshme të Kosovës shpesh herë janë cak i hajnave, të cilët ua vënë syrin gjërave me vlerë, e sidomos arkave të cilat vendosen me para të dedikuara për bamirësi, raporton Gazeta Sinjali.
Një rast i tillë ka ndodhur edhe dje në xhaminë e “Sinan Katibi” në komunën e Prizrenit, ku persona ende të paidentifikuar kanë thyer arkën dhe kanë vjedhur një shumë të të hollave.
Rasti është denoncuar nga përgjegjësi i xhamisë, i cili ka raportuar se hajnat kanë vjedhur të gjitha paratë e grumbulluara për bamirësi.
Burimet mediale brenda Prokurorisë kanë bërë me dije se njësitë policore kanë dalë në vendin e ngjarjes dhe kanë kryer ekzaminimet që ndihmojnë në zbardhjen e rrethanave të rastit.
Me urdhër të prokurorit, rasti është cilësuar ‘Vjedhje e rëndë’, ndërsa veprimet tjera ligjore do të merren posa të kapen të dyshuarit.
