Gjilani do të bëhet me orkestër frymore, me rreth 30 instrumentistë
E filluar si nimsë kohë më parë, më në fund është jetësuar ideja e krijimit të orkestrës frymore të Gjilanit.
Orkestra e sapo themeluar do të mbajë emrin “Selman Vokshi”, ndërsa përbëhet nga 30 profesionistë të muzikës, kryesisht profesionistë të instrumenteve frymore.
Sic mësohet, grupi ka paralajmëruar se së shpejti do të prezentojnë programin e tyre, ndërsa pret përkrahje nga institucionet kulturore, si ato komunale ashtu edhe qeveritare.
Profesori Izet Kallaba, ka mbështetur këtë ide të artistëve e profesorëve të muzikës, Uran Bllaca – klarinetist, Burim Demiri solokëngëtar e shumë të tjerë, duke theksuar se Gjilani ka pasur aq shumë nevojë për një të tillë orkestër.
“Sot për mua ishte një rastësi shumë e këndshme që kam pa formimin e një orkestre frymore, e cila do të mbajë emrin e ish profesorit të parë të frymoreve në shkollën e muzikës, prof. Selman Vokshi”, tha ai.
Profesori Izet Kallaba më tej vuri në dukje se kjo nismë duhet përshëndetur, pasi sipas tij, trupa do te jetë një orkestër e mrekullueshme e qytetit, për të cilën komuna ka shumë nevojë. Madje jo vetëm për këtë orkestër, por edhe për shumë tjera, ka shtuar ai, duke uruar themelimin e kësaj trupe të muzikës.
