Gjilan: Shkolla “Thimi Mitko” mbajti mbledhje komemorative në nderim të jetës e veprës së mësimdhënësit Bajram Ismajli
Mësimdhënësi Bajram Ismajli do t’i mungojë arsimit shqip. Ai la gjenerata të arta të gjuhëtarëve.
Në nderim të jetës dhe veprës së profesorit Bajram Ismajli, i cili ditë më parë ka ndërruar jetë në moshën 63- vjeçare, organizuar nga Shkolla e Mesme e Ultë “Thimi Mitko”, ku së fundi kishte punuar profesor i Gjuhës dhe Letërsisë Shqipe, është organizuar një mbledhje përkujtimore.
Drejtoresha e shkollës, Sevdije Sadiku, e ka çmuar lart veprën dhe kontributin e profesor Bajram Ismajli.
“Ai do të mbahet në mend si profesor i përkushtuar e i përpiktë në punë, i dashur për kolegët dhe nxënësit dhe i atillë që gjithmonë rrezatonte urti, dije e dashuri”, tha ajo.
Djali i tij Gentrit Ismajli, ka theksuar se kjo shkollë dhe kolegët e tij të punës, shumë shpesh kanë qenë pjesë e diskutimeve të babait të tij.
“Babai ka qenë tejet i përkushtuar për arsimin dhe tërë jetën i ka kushtuar edukimit dhe arsimimit të brezave të rinj dhe për këtë do të mund të fliste me orë të tëra. Familja Ismajli është e nderuar dhe falënderuese për këtë organizim për të nderuar jetën dhe veprën e babait”, prof. Bajram Ismajli.
Ish-nxënësja dhe së fundi edhe kolege e Bajram Ismajlit, Arba Aliu, ka thënë se ishte lajm i trishtë për vdekjen e arsimtarit dhe kolegut Bajram Ismajli.
“Biseda me të çdo herë të jepte një ndjesi të veçantë, kishte gjithherë një batutë për një ngjarje të pazakontë. Fjalët e tij të jepnin çdo herë motiv e dashuri për punë dhe këto janë përshtypjet e secilit kolegë. E unë si nxënëse e Shkollës Fillore në Livoç, ku isha nxënëse e arsimtarit Bajram dhe e kësaj shkolle si mësimdhënëse, pata fatin që t’a kem mësimdhënës e kolegë. Ai si mësimdhënës dha rezultat të madh, prej ligjërimeve mbresëlënëse dolën shumë gjenerata të arta, gjuhëtarë, profesorë e mësues, të cilët u mbushën me motiv për t’a dashur e për t’a studiuar gjuhën shqipe”, tha ajo.
