Gjilan: Merrte pagë pa shkuar në punë, arrestohen bibliotekisti dhe zyrtari që nuk e denoncoi rastin
Policia e Kosovës ka njoftuar se ka arrestuar dy persona të dyshuar për veprën penale “Keqpërdorim i pozitës apo autoritetit zyrtar”.
Sipas njoftimit të Policisë së Kosovës, respektivisht Drejtorisë për Hetimin e Krimeve Ekonomike dhe Korrupsionit (DHKEK) në Gjilan, arrestimet janë bërë pas hetimeve të zhvilluara në koordinim të plotë me prokurorinë kompetente, ku janë siguruar prova dhe të dhëna zyrtare të besueshme.
Ndonëse identitetetet nuk janë zbuluar, policia bën të ditur se njëri nga të dyshuarit, mashkull kosovar, i punësuar si bibliotekist në një shkollë me kontratë të përhershme, dyshohet se për një periudhë të gjatë nuk është paraqitur në vendin e punës, ndërkohë që ka përfituar paga mujore nga buxheti i Republikës së Kosovës.
Sipas Policisë, në periudhën nga viti 2023 deri në tetor të vitit 2025, i dyshuari ka dëmtuar buxhetin e Kosovës në vlerë prej 19,067.69 euro.
Ndërkaq, i dyshuari i dytë, po ashtu mashkull kosovar dhe person zyrtar, dyshohet se nuk ka raportuar mungesën e të dyshuarit të parë pranë autoriteteve kompetente, duke mundësuar vazhdimin e pagesave pa bazë ligjore.
Policia e Kosovës njofton se të dy të dyshuarit janë intervistuar në prani të avokatëve dhe, me vendim të prokurorit, janë ndaluar për 48 orë.
