Gjilan: Kryesuesi i Kuvendit, Kushtrim Kadriu ka pritur në takim ambasadorin hungarez në Kosovë, Bela Bozsik
Kryesuesi i Kuvendit të Komunës së Gjilanit, Kushtrim Kadriu me bashkëpuntorë asambleistë ne KK Gjilan, ka pritur në takim ambasadorin Hungarez, Bela Bozsik.
Në takim janë diskutuar tema të ndryshme ekonomike dhe mundësitë investive të bizneseve nga Hungaria në Gjilan, ka njoftuar Kadriu.
“Së bashku me z. Latif Maliqi, asambleist i LDK- së dhe z. Faton Milazimi, asambleist i PDK-së, patëm kënaqësinë që të presim në takim ambasadorin e Hungarisë, shkëlqësinë e tij z. Bela Bozsik. Gjatë këtij takimi diskutuam me theks të vecantë për zhvillimin ekonomik dhe potencialin e investimeve që kompanitë hungareze mund ta bëjnë në komunën tonë. Pastaj diskutuam edhe për arsimin, shëndetësinë dhe kulturën”, ka njoftuar Kadriu përmes faqes së tij në facebook.
“Ambasadori Bozski shprehu kënaqësinë e tij për vizitën në komunën tonë dhe njëherit njoftoi se shteti mik i Hungarisë do të vazhdojë ta përkrahë Republikën e Kosovës në lëmin e arsimit duke ndarë shumë bursa për studentët tanë”, ka shtuar më tej Kadriu.
Kadriu ka njoftuar poashtu se bashkë me kolegët asambleistë pjesëmarrës në takim, kanë falënderuar ambasadorin Bozski për vizitën dhe për gatishmërinë e tij për bashkëpunim.
