Franko Foda, selektor në qendër të vëmendjes: Kosova synon historinë për Botërorin 2026 ⚽
Selektori i Kosovës, Franko Foda, është optimist para ndeshjes vendimtare ndaj Sllovakisë dhe flet edhe për mbështetjen e tifozëve dardan.
Në një intervistë për mediumin austriak Kronen Zeitung, Foda tha se skuadra është përgatitur me intensitet të lartë dhe se objektivi i ekipit është i qartë. “Kur arrin deri këtu, natyrshëm dëshiron të bësh hapin tjetër. Javën tjetër do të përballemi me Sllovakinë në udhëtim. Nëse kualifikohemi më tej, do të kemi një ndeshje në shtëpi kundër fituesit të duelit Turqi – Rumani”, tha ai.
Kosova arriti këtë fazë pas një ecurie mbresëlënëse në grup, ndërsa Foda e vlerëson kundërshtarin si shumë të fortë, veçanërisht në shtëpi. “Sllovakët janë jashtëzakonisht të fortë në shtëpi, gjë që tregoi edhe fitorja e tyre kundër Gjermanisë. Por tani kemi më shumë lojtarë cilësorë në skuadër, me ardhjen e Fisnik Asllanit, Leon Avdullahut dhe Albion Hajdarit. Opsionet dhe cilësia janë rritur, dhe tashmë kemi fituar jashtë vendit kundër Suedisë, Sllovenisë dhe Islandës. Gjasat janë 50 me 50”, theksoi Foda.
Trajneri gjerman u shpreh gjithashtu për atmosferën mbresëlënëse dhe mbështetjen e tifozëve kosovarë. “Në Suedi gjysma e stadiumit ishte me kosovarë. Kjo i jep ekipit energji të madhe. Ndihemi si në shtëpi kudo ku shkojmë”, tha ai.
Foda u shpreh i kujdesshëm për një kualifikim eventual në Kupën e Botës 2026. “Jo, nuk mund të bëjmë plane përpara ndeshjeve kualifikuese. E vetmja gjë e sigurt është se kampi ynë do të vendoset mes Los Angelesit dhe San Franciscos. Nëse shkojmë në Kupën e Botës, do të doja të flija në një hotel për të rinj”, shtoi ai me humor.
Kosova synon një arritje historike, ndërsa përballja me Sllovakinë pritet të jetë testi më i madh deri më tani për skuadrën e drejtuar nga Foda.
