| EKSPOZITË – LARUSHI MOTIVESH DHE TEKNIKASH SHPREHËSE
Gjilan, 17 TETOR – Dy nxënëset e shkollës “Adem Kastrati”, Rejhane Abazi dhe Leonora Xhymshit, sot kanë ekspozuar punime të tyre në pëlhurë, vizatim dhe dizajn veshjeje, në ekspozitën e tyre të përbashkët me rastin e pensionimit të profesorit të shkollës, Avni Behluli
Që të dyja, para hapjes, kanë falënderuar profesorët për përkushtimin që kanë treguar në përcjelljen e dijeve dhe zhvillimin e talentit tek ato, shenja këto të cilat vëreheshin në punën që kanë bërë dhe të tjerët që kanë marrë pjesë në hapje të saj.
Më pas, Agim Kajtazi, profesor dhe njëherësh kujdestar i tyre, ka pohuar se është ndjenjë e mirë t’i shohësh nxënëset, të cilat, si në mësime, edhe jashtë tij, tregohen kërkuese me atë që bëjnë.
“Në art, përveç frymëzim për t’u shprehur, duhet dije gjithsesi, por edhe guxim. Guxim në kuptimin për ta shpërfaqur para të tjerëve temën, emocionin, ndjesinë që ke pasur përderisa ke realizuar një vepër të caktuar. Rejhanja dhe Leonora sot duke ekspozuar këto punime të tyre, të cilat i kanë realizuar gjatë këtyre dy-tri viteve të fundit, e kanë dëshmuar këtë. Dhe kjo është gjë e mirë. Tani ato, orët e ditët në vazhdim do të përballen me komentet e të tjerëve për punimet e tyre. Dikush sigurisht ka për t’i lavdëruar, dikush tjetër edhe mund t’u jap ndonjë vërejtje të vogël. S’ka problem. Ju mos u merakosni! Mos hiqni dorë nga kjo rrugë në të cilën jeni futur!”, ka thënë ai.
Ndërsa, profesor Avni Behluli, gjithashtu edhe kurator i kësaj ekspozite, ka pohuar se Rejhanja dhe Leonora po dëshmojnë se Shkolla e Mesme e lartë e Artit Pamor “Adem Kastrati” në Gjilan, me punë e angazhim të mësimdhënësve po nxjerrë talente të reja në fushën e artit pamor.
“Rejhanja e Leonora, në punimet e tyre kanë shprehur ndjenjat, emocionet e shpirtin e tyre kreativ, duke përdorur tema e motive si: natyrë të qeta, figura njerëzish e portrete. Në këto imazhe vërehet qartë ndjeshmëria për ngjyrat, kompozimin dhe shtrirjen e tyre edhe në cikle”, ka thënë ndër të tjera, ai.
Kjo ekspozitë do të jetë e hapur për disa ditë.
