Edhe vazhdimi i 14-të dështim, pasnesër përpjekja e 15-të për konstitituim të Kuvendit
Mbi tre muaj pas zgjedhjeve të 9 shkurtit dhe gati një muaj pas fillimit të seancës konstituive (nga 15 prilli) nuk u konstitua Kuvendi i Kosovës. Dështoi edhe vazhdimi i sotëm i seancës, përpjekja e 14-të me radhë për konstituim të këtij institucioni ligjvënës.
Vazhdimi i sotëm ishte i njëjtë me vazhdimet e mëparshme: përsëri tentim i Lëvizjes Vetëvendosje për krijimin e një komisioni ad-hoc për votim të fshehtë.
Kryesuesi Avni Dehari kërkoi nga PDK-ja, LDK-ja, AAK-ja dhe Lista Serbe që të bëjnë propozimet e tyre për komision, por këto parti nuk pranuan dhe nuk morën pjesë në votim.
Ishin 54 vota për, asnjë kundër, asnjë abstenim.
Dehari bëri të ditur se seanca ndërprehet dhe se do të vazhdojë më 13 maj, në orën 10.00.
Vetëvendosje nuk po heq dorë nga kandidimi i Albulena Haxhiut për kryetare të Kuvendit, duke këmbëngulur se është gruaja më e votuar, ndërsa tri partitë e tjera më të mëdha PDK-ja, LDK-ja dhe AAK-ja janë kundër kësaj kandidateje, duke e cilësuar si figurë përçarëse.
