Dy vetura morën në shërbim dhe nuk i kthyen, Policia arreston njëri nga të dyshuarit
Veturat që i morën në shërbim dy të rinj në Ferizaj nuk i kthyen më, e për këtë njëri nga ta është arrestuar nga ana e Policisë së Kosovës.
Sipas njoftimit zyrtar, i arrestuari veturën që nuk ishte nën pronësinë e tij e kishte shitur në qytetin e Lipjanit tek një person tjetër.
Përderisa, personi i dytë i dyshuar në këtë rast është ende në kërkim.
Ngjarja kishte filluar më 18 dhjetor 2022 kur stacioni policor në Ferizaj, rreth orës 19:20 kishte pranuar një informacion se në rrugën ‘’Sali Çeku’’ në Ferizaj është një rast i shpërdorimit të pasurisë së huaj.
Pas kësaj, Policia ka treguar se zyrtarët policor nën autorizim të prokurorit kujdestar nga Prokuroria Themelore në Ferizaj, i kanë marrë veprimet e nevojshme dhe menjëherë kanë dalë në vendin e ngjarjes dhe i kanë nisur hetimet.
“Nga hetimet e para, sipas ankuesit, dy të dyshuar i kanë marrë dy automjete në shërbim dhe nuk ishin lajmëruar më” – u tha në njoftim.
Tutje është njoftuar se policët hetues, pas një pune intensive hetimore, grumbullimit të informacioneve në terren, kanë arrestuar personin L.Q., 23-vjeçar, i cili pasi kishte marrë në shërbim një veturë nga personi E.J., 22-vjeçar, dhe e kishte shitur atë në qytetin e Lipjanit një personit tjetër.
“I dyshuari i parë L.Q është shoqëruar në stacionin e policisë në Ferizaj dhe pas intervistimit nga policët hetues, me vendim të prokurorit të rastit, është ndaluar në mbajtje për 48 orë për procedura të mëtejme” – u tha tutje.
Policia tregoi se rasti është cilësuar “Shpërdorimi i pasurisë së huaj’’, ndërsa vetura i është kthyer pronarit.
