Dorëhiqet Malazog Hoxha, kryetar i Lidhjes Rajonale të Futbollit në Gjilan
Malazog Hoxha, kryetar i Lidhjes Rajonale të Futbollit në Gjilan ka dhënë dorëheqje nga ky post.
Ai përmes një njoftimi publik ka bërë të ditur vendimin për largim, pa dhënë detaje për arsyet e dorëheqjes.
“Të nderuar miq, përkrahës e bashkëpunëtorë, nëpërmjet këtij shkrimi dua t’iu njoftoj me vendimin për dorëheqjen time nga pozita e kryetarit te Lidhjes Rajonale te futbollit të Gjilanit, pas tri mandateve shumë të suksesshme. Duke menduar gjithmonë në të mirën për regjionin tonë dhe asnjëherë në rrafshin personal, në rrethanat momentale e shoh të arsyeshme tërheqjen time nga posti i kryetarit te LRFGJ-së”, ka shkruar ai.
Më tej Hoxha ka shkruar e njoftuar për aktivitetet e zhvilluara ndër vite në krye të LRFGJ-së, duke i cilësuar suksese të jashtëakonshme.
“Përgjatë këtyre dhjetë viteve, arritëm suksese të jashtëzakonshme së bashku. Mirënjohës gjithmonë për përkrahjen dhe bashkëpunimin e ngushtë. Falënderues dhe gjithmonë i përulur para jush; klube të futbollit, shkolla të futbollit, gjyqtarë, delegatë e bashkëpunëtorë, për mbështetjen e jashtëzakonshme dhe të palëkundur përgjatë këtyre dhjetë viteve”, ka përfunduar ai.
