Dogana ndalon dhe asgjëson mbathje sportive të falsifikuara në Aeroportin e Prishtinës
Një sasi e konsiderueshme e mallrave të llojit mbathje sportive për meshkuj, është ndaluar dhe asgjësuar nga Dogana e Kosovës në Aeroportin Ndërkombëtar të Prishtinës, pasi të njëjtat gjatë ekzaminimit u konstatua se ishin të falsifikuara dhe cenonin të drejtën e pronësisë intelektuale.
Në njoftimin e Doganës bëhet e ditur se mallrat mbanin shenjat dalluese të disa prej brendeve të njohura ndërkombëtare.
“Në përputhje me dispozitat ligjore dhe procedurat e parashikuara në Kodit Doganor dhe të Akcizës (KDAK), mallrat e konstatuara si të falsifikuara janë asgjësuar në mënyrë të kontrolluar nën mbikëqyrjen e zyrtarëve doganorë”, thuhet në komunikatën e Doganës.
Gjithashtu, ndaj subjektit përgjegjës janë ndërmarrë edhe masa ligjore.
“Ndaj subjektit përgjegjës janë ndërmarrë masat ligjore përkatëse, të parapara me legjislacionin në fuqi, për përfshirje në tregti të ndaluar dhe cenim të pronësisë intelektuale”, thuhet në komunikatë.
