Daja: I kënaqur me lojën dhe rezultatin, në Bullgari për një tjetër fitore
Ballkani bëri një paraqitje mbresëlënëse ndaj bullgarëve të Ludogorets, duke triumfuar 2-0 në “Fadil Vokrri”, teksa trajneri Ilir Daja nuk e fshehu kënaqësinë për lojën dhe suksesin e lojtarëve të tij.
“Kemi luajtur një pjesë të parë perfekte, pasi skuadra kundërshtare nuk kishte asnjë shans. Kemi bërë mirë edhe me qarkullimin e topit. Me pesë ndërrimet e tyre ramë pak fizikisht, por këta djem nuk dorëzohen kurrë. E thash në mënyrë figurative që e japin shpirtin në fushë dhe kjo ndodhi sot. Nuk është e pakët që në 70 për qind të kohës të jesh mbi kundërshtarin, duke ditur se çfarë kundërshtari kishim përballë”, u shpreh tekniku i Ballkanit.
Ndonëse me një këmbë në turin tjetër, trajneri Daja bën apel që skuadra të ruajë përqendrimin edhe për ndeshjen e kthimit në Bullgari.
“Duhet të bëjmë edhe më mirë se në fushën tonë. Kemi përballë ekip me kualitet dhe nuk do të shkojmë për të mbrojtur rezultatin. Kemi bërë gjysmë hapi, por nuk kemi bërë ende asgjë. Nuk ka rëndësi rezultati pas 90 minutave, por pas 180 minutave”, tha trajneri Daja.
