Bujanoc: Gratë në veprim – Formohet Shoqata e Grave Pensioniste në Bujanoc!
Me iniciativë të zonjave, Vjollca Sadiki dhe Xhevahire Shabani, mësimdhënëse në pension, në Bujanoc u përurua themelimi i Shoqatës së Grave Pensioniste, një nismë kjo që synon organizimin, aktivizimin dhe fuqizimin e grave që kanë dhënë kontribut të çmuar ndër vite në arsim, shoqëri dhe jetën publike.
Kësaj iniciative iu bashkuan edhe gra të tjera që janë në pension, duke shprehur gatishmërinë për t’u angazhuar në mënyrë të organizuar. Ndërkohë, në solemnitetin e mbajtur me këtë rast ishin të ftuara edhe përfaqësuese të tjera nga jeta publike dhe shoqëria civile, çka i dha ngjarjes një karakter të veçantë simbolik dhe përmbajtësor.
Zonjat Sadiki dhe Shabani njihen si ndër femrat e para shqiptare që u inkuadruan në jetën publike të Komunës së Bujanocit. Si njëra ashtu edhe tjetra kanë drejtuar organizata të shoqërisë civile, duke bashkuar rreth vetes shumë gra të tjera dhe duke krijuar hapësira për angazhim, solidaritet dhe pjesëmarrje aktive shoqërore.
Përveç veprimtarisë në shoqërinë civile, ato kanë qenë edhe pjesëmarrëse aktive në jetën politike dhe institucionale të Bujanocit, duke dhënë kontribut të drejtpërdrejtë në proceset vendimmarrëse dhe zhvillimore të komunës. Në veçanti, theksohet fakti se znj. Vjollca Sadiki ka qenë drejtoresha e parë shqiptare e një institucioni publik të themeluar nga Komuna e Bujanocit, duke udhëhequr me sukses Shtëpinë e Kulturës.
Themelimi i Shoqatës së Grave Pensioniste në Bujanoc shihet si një hap i rëndësishëm drejt valorizimit të përvojës, dijes dhe energjisë së grave pensioniste, të cilat edhe pas përfundimit të karrierës profesionale vazhdojnë të jenë faktor aktiv në jetën shoqërore. Kjo nismë dëshmon se angazhimi qytetar nuk njeh moshë, ndërsa gratë e Bujanocit vazhdojnë të jenë shembull i përkushtimit dhe veprimit në dobi të komunitetit.
