Ballkani mposht Dritën në Gjilan – lufta për titull sa shkon e bëhet më interesant
Ballkani e ka mposhtur Dritën me rezultat 2-1 në kuadër të javës së 33-të në Albi Mall Superligën e Kosovës.
Ndeshjen më mirë e nisi kampioni në fuqi, që rrezikoi pas vetëm dy minutash lojë përmes një goditje nga këndi.
Kaluan vetëm 11 minuta nga ndeshja dhe Ballkani kaloi në epërsi me golin e Meriton Korenicës, ndërsa Nazmi Gripshi ishte asistues.
Në minutën e 24-të, Korenica lëshoi një rast ideal për gol, pas një pasimi të saktë të Albion Rrahmanit.
Derisa po përfundonte pjesa e parë, Drita ia doli t’i barazonte shifrat në 1-1 me golin e Muharrem Jasharit, ndërsa Ilir Blakëori ishte asistuesi.
Në pjesën e dytë, skuadra gjilanase rrezikoi me anë të Blend Baftiut në minutën e 54-të, por gjuajtja e tij shkoi mbi portë.
Ekipi nga Suhareka nuk u dorëzua deri në fund dhe ia doli ta rikthente epërsinë me golin e Lumbardh Dellovës, pas asistimit të Armend Thaqit nga korneri.
Pas javës së 33-të, Drita dhe Ballkani kanë pikët e njëjta (66) dhe lufta për titull duket se do të jetë e hapur deri në ndeshjen e fundit.
