Argumentet përfundimtare të Kamala Harris: Thirrje për amerikanët për të refuzuar kaosin dhe ndarjen e sjellë nga Trump
Zëvendëspresidentja e SHBA-së, Kamala Harris u kërkoi amerikanëve të shkruajnë një kapitull të ri për vendin e tyre dhe të refuzojnë kaosin dhe ndarjen e sjellë nga Donald Trump, si pjesë e një fjalimi që fushata e saj e prezantoi si një “deklaratë përfundimtare” për votuesit, duke iu drejtuar atyre nga Qendra Kombëtare në Uashington, ndërsa në sfond shihej Shtëpia e Bardhë e ndriçuar.
Kandidatja demokrate për presidente paralajmëroi se Trump dëshiron të ketë “pushtet të pakontrolluar” në një fjalim para turmës.
“Ai është dikush që është i paqëndrueshëm, i fiksuar pas hakmarrjes, i konsumuar nga nevoja për t’u ankuar dhe dikush që dëshiron të ushtrojë pushtetin pa kontroll,” tha Harris në tubim, saktësisht një javë para se amerikanët të shkojnë në zgjedhje në mënyrën më dramatike dhe përçarëse në historinë moderne të Shteteve të Bashkuara.
Harris më pas iu drejtua një vizioni optimist për të ardhmen e Amerikës, duke përdorur simbolikën e Shtëpisë së Bardhë të ndriçuar në sfond, si një mesazh subkoshience për votuesit se ajo është gati për presidencën.
“Amerikë, unë jam këtu për t’ju thënë se nuk jemi të tillë,” i tha Harris një turme mbështetësish që valëvitnin flamurin.
“Secili prej jush ka fuqinë të kthejë faqen dhe të fillojë të shkruajë një kapitull të ri në historinë më të jashtëzakonshme të treguar ndonjëherë.”
Selia zgjedhore e Kamala Harris pretendon se 75,000 njerëz u mblodhën në National Mall, gjë që nuk mund të verifikohej menjëherë.
Harris paralajmëroi se zgjedhjet janë për të zgjedhur midis “një vendi të rrënjosur në lirinë për çdo amerikan dhe një vendi në të cilin mbretëron kaosi dhe përçarja”.
Ajo i kujtoi turmës se Trump qëndroi në të njëjtin vend gati katër vjet më parë dhe “dërgoi një turmë të armatosur” në Kapitol.
Në sulmin në Kapitol që tronditi botën, u plagosën 140 policë.
Harris trajtoi gjithashtu një nga dobësitë e saj kryesore – faktin që disa votues ende e shohin atë si një zgjatje të mandatit të Joe Biden, i cili u tërhoq nga gara për Shtëpinë e Bardhë në korrik.
“Mandati im presidencial do të jetë ndryshe, sepse sfidat me të cilat përballemi janë të ndryshme”, premtoi ajo.
