Apeli i jep të drejtë Naser Korçës për rastin e varrezave të reja në Gjilan
Gjykata e Apelit ka vendosur në favor të ish-drejtorit të Shërbimeve Publike në Gjilan, Naser Korça, në rastin që lidhej me lokacionin e varrezave të reja në komunë.
Procesi gjyqësor kishte nisur pas vendimit të vitit 2019 të ish-kryeministrit Ramush Haradinaj, me të cilin një pronë e menaxhuar nga AKP-ja iu kalua Komunës së Gjilanit për ndërtimin e varrezave të reja.
Pas nisjes së projektit, punimet u ndërprenë dhe çështja përfundoi në gjykatë, ku Korça u përball edhe me akuza për shpifje.
Në shkallën e parë, Gjykata Themelore e kishte dënuar me rreth 6 mijë euro. Pas ankesës në Apel dhe paraqitjes së provave nga mbrojtja, trupi gjykues ka rrëzuar të gjitha pretendimet e paditësit dhe ka vendosur në favor të Korçës.
Sipas deklarimeve, ky vendim konfirmon se angazhimi institucional për zgjidhjen e çështjes së varrezave të reja, në bashkëpunim me kryetarin Lutfi Haziri, ka qenë i drejtë dhe në interes të qytetarëve.
Edhe pse kanë kaluar gati 7 vite nga nisja e këtij procesi, Gjilani vazhdon të përballet me mungesë të hapësirave për varrim. Çështja e varrezave të reja mbetet ende urgjente për zgjidhje.
