UKZ pjesë e vizitës studimore në Vjenë e organizuar nga SHER
Universiteti Publik “Kadri Zeka” mori pjesë në një vizitë studimore të organizuar në Vjenë, Austri, nga OeAD dhe SHER, ku u mblodhën përfaqësues të institucioneve të arsimit të lartë dhe udhëheqës të zyrave për bashkëpunim ndërkombëtar.
Në kuadër të kësaj vizite, Universiteti Publik “Kadri Zeka” u përfaqësua nga U.D. Udhëheqësi i Zyrës për Bashkëpunim Ndërkombëtar dhe Anëtarësime, Betim Berisha, i cili mori pjesë aktive në diskutime dhe aktivitete të fokusuara në ndërkombëtarizimin e arsimit të lartë dhe zhvillimin e bashkëpunimeve akademike. Gjatë qëndrimit, ai pati mundësinë të përfitojë nga praktikat dhe përvojat e universiteteve të ndryshme austriake.
Gjatë këtij organizimi, pjesëmarrësit u njohën me rolin e OeAD dhe programet e tij të financimit dhe mbështetjes për arsimin e lartë. Gjithashtu, u diskutua mbi Procesi i Bolonjës dhe zhvillimet në ndërkombëtarizim.
Programi përfshiu vizita në institucione prestigjioze si Universiteti i Bujqësisë në Vjenë (BOKU), Universiteti Mjekësor i Vjenës, Universiteti Teknik i Vjenës dhe Hochschule Campus Wien.
Vizita u monitorua nga Shqiponjë Kodraliu, zyrtare e SHER, e cila ndoqi nga afër të gjitha aktivitetet e zhvilluara në Vjenë.
Gjatë qëndrimit në Vjenë, përfaqësues të institucioneve të arsimit të lartë, kanë paraqitur prezantime institucionale, kanë vizituar kampuse, si dhe kanë pasur diskutime mbi praktikat më të mira në menaxhimin e bashkëpunimeve ndërkombëtare, programet e mobilitetit dhe zhvillimin e partneriteteve strategjike.
Kjo përvojë përfaqëson një hap të rëndësishëm drejt forcimit të bashkëpunimit ndërkombëtar të Universitetit Publik “Kadri Zeka” dhe zgjerimit të mundësive për studentët dhe stafin akademik.
