Abdixhiku prezanton projektet që kapin vlerën 5 miliardë euro, pyet qytetarët se cili është më i nevojshmi për ta
Kryetari i LDK-së, njëherit kandida për Kryeministër në zgjedhjet e 9 shkurtit, ka pyetur qytetarët për disa projekte të cilat kapin vlerën e pesë miliardë investime, se cili do të ishte më i nevojshmi për ta, shkruan Gazeta Online Reporteri.net.
Ai ka thënë se nuk është i interesuar të flas për të shkuarën, t’i ndajë apo t’i përçajë, por ka thënë se do të ofrojë vizitonin e partisë që drejton për të ardhmen me projekte që ndikojnë në jetën e qytetarëve.
“KAM NJË PYETJE.CILI NGA KËTO PROJEKTE ËSHTË MË I NEVOJSHMI PËR JU? Këto janë disa nga zotimet tona të Programit ‘Rruga e Re’. Nga Spitali i Ri, tek Stadiumi Kombëtar e Palestra e Sporteve, nga Qendra e Skijimit në Brezovicë tek Teatri Kombëtar, nga Centrali i Ri me Gaz, tek Unaza e Jashtme e Kryeqytetit; Gaming Hall, Teatri i Operas e Baletit, magjistralet rajonale, Parku Teknologjik e Qendra Kombëtare për Intelegjencë Artificiale! 5 miliardë euro investime”.
“Cili nga këto projekte është më i nevojshmi për ju? Pëlqejeni, individualisht, projektet infrastrukturore që ndikojnë jetën e juaj më së shumti! Programi ‘Rruga e Re’, botimi i tretë – i përditësuar dhe final, është i publikuar në faqen e LDK-së. Me 70 mijë fjalë, i shkruar për mbi 2 vite, nga 270 ekspertë, ky program e bën të ardhmen e vendit tonë siç e kemi ëndërruar përherë! Nuk jam i interesuar të flas për të shkuarën. Nuk jam i interesuar të ju ndajë e përçajë. Dua të ju ofrojë vizionin tonë për të ardhmen me projekte që ndikojnë në jetën tuaj! Këto projekte me gjithë program, janë prezantuar në 7 takime tematike brenda #LUMIR2025, e në takim me 150 bizneset më të mëdha në vend!”, shkruan mes tjerash Abdixhiku në Facebook.
Tutje ai shton se “për ata me mendje në shekullin e shkuar, vizualizimi i projekteve të shkruara nga 270 ekspertë, është bërë me prompte të Midjourney e ChatGPT”.
