Kamenicë, përmbyllet fushata njëmujore kundër trafikimit me qenie njerëzore
Komuna e Kamenicës ka përmbyllur fushatën vetëdijësuese kundër trafikimit me qenie njerëzore, e cila është zhvilluar nga 18 tetori deri më 18 nëntor 2026, nën sloganin “MOS HESHT”, me mesazhin “TRAFIKIMI PREK TË GJITHË! TA MBROJMË VETEN DHE FËMIJËT TANË!”.
Fushata është organizuar nga Njësia Komunale për të Drejtat e Njeriut (NJKDNJ), në kuadër të Drejtorisë së Administratës, nën koordinimin e Nazmije Demolli Kastrati, në bashkëpunim me Drejtorinë Komunale të Arsimit, Stacionin Policor në Kamenicë dhe OJQ-në “Dardana Press”.
Gjatë një muaji janë zhvilluar aktivitete të ndryshme vetëdijësuese, përfshirë sesione informuese me nxënës në shkolla, bashkëbisedime me qytetarë të grupmoshave të ndryshme dhe shpërndarje të materialeve ndërgjegjësuese në shkolla, fshatra dhe hapësira publike të komunës.

Përmes këtyre aktiviteteve është synuar informimi i qytetarëve për format, rreziqet dhe pasojat e trafikimit me qenie njerëzore, si dhe rëndësia e parandalimit dhe raportimit të rasteve të dyshimta.

Angazhimi i Komunës së Kamenicës në realizimin e kësaj fushate është vlerësuar edhe nga Ministria e Administrimit të Pushtetit Lokal (MAPL). Përmes një letre falënderimi, Luljeta Ibishi Ferizi, zyrtare e lartë për të Drejtat e Njeriut në Komuna, ka përgëzuar institucionet komunale për organizimin, koordinimin dhe dokumentimin e aktiviteteve.
Në vlerësimin e saj, raporti i paraqitur nga Komuna e Kamenicës është cilësuar si shembull i mirë i punës dhe bashkëpunimit ndërinstitucional. Veçanërisht është theksuar përkushtimi i koordinatores Nazmije Demolli Kastrati, si dhe bashkëpunimi me institucionet arsimore, Policinë e Kosovës, organizatat e shoqërisë civile dhe komunitetin.
MAPL-ja ka vlerësuar gjithashtu shtrirjen e aktiviteteve në shkolla, lokalitete të ndryshme dhe hapësira publike, duke përfshirë nxënës, të rinj dhe qytetarë të grupmoshave të ndryshme. Kjo qasje, sipas vlerësimit, ka ndikuar në rritjen e dukshmërisë dhe gjithëpërfshirjes së fushatës.
Ndërkaq, koordinatorja e NJKDNJ-së, Nazmije Demolli Kastrati, ka falënderuar të gjithë partnerët institucionalë dhe bashkëpunëtorët për mbështetjen dhe kontributin në realizimin e aktiviteteve, duke veçuar Drejtorinë Komunale të Arsimit, Stacionin Policor në Kamenicë, OJQ-në “Dardana Press” dhe Luljeta Ibishi Ferizin nga Divizioni për Avancimin e të Drejtave të Njeriut në Komuna pranë MAPL-së.
Komuna e Kamenicës dhe Njësia Komunale për të Drejtat e Njeriut kanë bërë të ditur se do të vazhdojnë aktivitetet parandaluese dhe vetëdijësuese gjatë gjithë vitit, me synimin për mbrojtjen e të drejtave të njeriut dhe krijimin e një mjedisi më të sigurt për të gjithë qytetarët.
