Nga futbolli i madh në Harvard, Kosovare Asllani e ftuar nga profesoresha e njohur Anita Elberse
Futbollistja me origjinë nga Kosova, Kosovare Asllani, ka qëndruar në Harvard Business School, ku me ftesë të profesoreshës Anita Elberse ka marrë pjesë në ligjërata dhe diskutime mbi zhvillimin dhe të ardhmen e sportit të grave.
Lajmin e ka bërë të ditur vetë Asllani përmes një postimi në rrjetet sociale, ku ka ndarë përshtypjet nga dita e parë në këtë institucion prestigjioz amerikan.
Ajo ka treguar se ka pasur mundësinë të ndjekë ligjërata, të përjetojë nga afër mjedisin akademik të Harvardit dhe të zhvillojë diskutime domethënëse për rritjen dhe perspektivën e sportit të grave.
Futbollistja ka veçuar veçanërisht kulturën e debatit, të pyetjeve dhe të sfidimit të këndvështrimeve të ndryshme, duke e vlerësuar një mjedis ku nxitet shprehja e lirë e mendimit, argumentimi dhe hapja ndaj ideve të reja.
Në postimin e saj, Asllani ka falënderuar posaçërisht profesoreshën Anita Elberse për ftesën dhe mikpritjen, duke shprehur entuziazmin për ditët e tjera të qëndrimit në Harvard.
Anita Elberse është profesoreshë e administrimit të biznesit në Harvard Business School, ku njihet për hulumtimet dhe ligjëratat e saj në fushën e biznesit të sportit, medias dhe industrisë së argëtimit. Ajo është ndër emrat e njohur akademikë që studiojnë mënyrën se si funksionojnë dhe zhvillohen këto industri.
Karriera që e çoi në një nga institucionet më prestigjioze akademike
Ftesa e Asllanit në Harvard vjen në kontekstin e përvojës së saj të gjatë në futbollin ndërkombëtar dhe angazhimit për avancimin e sportit të grave.
E lindur në Suedi, në një familje me origjinë shqiptare nga Kosova, ajo ka ndërtuar një karrierë të rëndësishme në futbollin evropian, duke luajtur për skuadra të njohura si Paris Saint-Germain, Manchester City, Real Madrid dhe AC Milan.
Me Kombëtaren e Suedisë, Asllani ka marrë pjesë në tri edicione të Lojërave Olimpike. Ajo fitoi medaljen e argjendtë në Rio 2016 dhe Tokio 2020, ndërsa me Suedinë arriti edhe dy medalje të bronzta në Kampionatet Botërore të vitit 2019 dhe 2023.
Përtej sukseseve në fushën e lojës, Asllani është angazhuar vazhdimisht për rritjen e dukshmërisë së futbollit të grave, përmirësimin e kushteve për futbollistet dhe krijimin e më shumë mundësive për gjeneratat e reja.
Pikërisht përvoja e saj në nivelet më të larta të futbollit, njohja nga afër e sfidave të sportit profesional dhe angazhimi për zhvillimin e futbollit të grave e bëjnë përvojën e saj një kontribut me vlerë në diskutimet që zhvillohen në Harvard Business School.
