Suedia konfiskon pasuri në Kosovë, rasti i parë i këtij lloji jashtë territorit të saj
Bashkëpunimi ndërmjet autoriteteve të Kosovës dhe atyre suedeze ka rezultuar me sekuestrimin e pronave të paluajtshme, parave të gatshme dhe një automjeti në Kosovë, në kuadër të një hetimi për trafikim të narkotikëve dhe shpëlarje të parave.
Zyra e Kryeprokurorit të Shtetit ka bërë të ditur se bashkëpunimi ndërmjet Prokurorisë Speciale të Kosovës dhe autoriteteve suedeze ka çuar në arrestimin e personit me inicialet A.G. dhe konfiskimin e pasurive që dyshohet se janë fituar përmes veprimtarive kriminale.
Sipas njoftimit, rasti tashmë ka marrë epilog gjyqësor në Suedi dhe shënon rastin e parë kur autoritetet suedeze kanë arritur të konfiskojnë pasuri jashtë territorit të tyre.
Zyra për Rikthimin e Aseteve, e cila funksionon në kuadër të Zyrës së Kryeprokurorit të Shtetit, në bashkëpunim me autoritetet suedeze, do të ndërmarrë hapat e mëtejmë për zbatimin përfundimtar të vendimit për pasuritë e konfiskuara në Kosovë.
Ndërkaq, sipas komunikatës së autoriteteve suedeze, personi A.G. ishte arrestuar në rajonin e Goteborgut, nën dyshimin për trafikim të narkotikëve në përmasa jashtëzakonisht të mëdha dhe shpëlarje të rëndë të parave.
KOMUNIKATË PËR MEDIA
Prishtinë, 6 nëntor 2026 – Zyra e Kryeprokurorit të Shtetit mirëpret bashkëpunimin e Prokurorisë Speciale të Kosovës me autoritetet e shtetit të Suedisë në një çështje penale në luftimin e trafikimit të narkotikëve dhe shpëlarjes së parave.
Si rrjedhojë e ndërmarrjes së veprimeve hetimore nga Prokuroria Speciale është arritur që të arrestohet personi me inicialet A.G. dhe t’i konfiskohen pasuritë e fituara me vepra penale.
Ky rast ka marrë epilog gjyqësor në shtetin suedez dhe përbën precedentin e parë që shteti suedez ka arritur të sekuestrojë pasuri jashtë juridiksionit të vet territorial.
Zyra për Rikthimin e Aseteve, e cila funksionon në kuadër të Zyrës së Kryeprokurorit të Shtetit, së bashku me autoritetet suedeze, do të ndërmarrë hapa të mëtejmë për ekzekutimin final të pasurive të konfiskuara në Kosovë me vendim të plotfuqishëm të autoriteteve suedeze.
Ky rast përbën një shembull të mirë të bashkëpunimit juridik ndërkombëtar, veçanërisht në konfiskimin e aseteve të fituara me vepra penale kudo që ato ndodhen.
Institucioni i Prokurorit të Shtetit mbetet i përkushtuar që të thellojë bashkëpunimin me vendet partnere në luftimin e të gjitha formave të kriminalitetit me element ndërkombëtar.
Bashkëngjitur gjeni edhe komunikatën e autoriteteve suedeze lidhur me këtë rast:
