PDK Gjilan: “Kishnapola meriton kujdes, jo braktisje” – Kërkohet rikthimi i menjëhershëm i ambulancës
Gjilan, 03.11.2026 – Partia Demokratike e Kosovës, Dega në Gjilan, ka reaguar ashpër ndaj vendimit të Drejtorisë së Shëndetësisë dhe Mirëqenies Sociale për ndërprerjen e shërbimeve shëndetësore në ambulancën e fshatit Kishnapolë, duke filluar nga data 2 nëntor 2026.
Sipas PDK-së, me këtë vendim banorët e Kishnapolës dhe të fshatrave përreth mbeten pa shërbime shëndetësore në vendbanimin e tyre dhe detyrohen të drejtohen në Qendrën e Mjekësisë Familjare në Bresalc.
“Vlerësojmë se ndërprerja e shërbimeve nuk përbën zgjidhje për problemet e organizimit dhe menaxhimit të shëndetësisë. Përkundrazi, përgjegjësia e institucioneve komunale është të sigurojnë kushtet dhe personelin e nevojshëm për funksionimin e shërbimeve shëndetësore, veçanërisht në zonat rurale, ku qasja është më e vështirë”, thuhet në reagimin e PDK-së.
Partia demokratike ka ngritur shqetësim edhe për mungesën e arsyetimit të plotë në njoftimin zyrtar, si dhe për mos-përcaktimin e një afati për rikthimin e ambulancës në funksion.
Kërkesat e PDK-së:
1. Drejtoria e Shëndetësisë të bëjë publik arsyetimin e plotë të vendimit
2. Të ndërmerren masa konkrete për rikthimin sa më të shpejtë të ambulancës në funksion
3. Të përcaktohet një afat i qartë për rifillimin e shërbimeve
4. Kryetari i Komunës së Gjilanit të marrë përgjegjësinë institucionale dhe të angazhohet drejtpërdrejt për zgjidhjen e situatës
“Nuk mund të flitet për përmirësim të shëndetësisë në Komunën e Gjilanit, ndërkohë që banorëve të zonave rurale u ndërpriten shërbimet ekzistuese, pa u ofruar një zgjidhje e qartë dhe e qëndrueshme”, thuhet më tej në reagim.
PDK Gjilan përfundon se do ta përcjellë këtë çështje dhe do të kërkojë llogaridhënie nga institucionet përgjegjëse deri në gjetjen e një zgjidhjeje konkrete.
“Shërbimet shëndetësore duhet të jenë pranë qytetarëve, jo të largohen prej tyre!”
Partia Demokratike e Kosovës – Dega në Gjilan
