“THIMI MITKO” E PARA NË GJILAN ME PROJEKT-RREGULLORËN E RE PËR RENDIN DHE MIRËSJELLJEN

GJILAN – Për herë të parë në Komunën e Gjilanit, SHFMU “Thimi Mitko” ka mbajtur takim konsultativ për shqyrtimin e projekt-rregullores për organizimin e punës, rendin shtëpiak dhe kodin e mirësjelljes.

Drejtoresha Ardhmërije Jakupi Musliu: “Rregullat vlejnë për të gjithë komunitetin shkollor“

Qëllimi është krijimi i rregullave të qarta dhe një mjedisi shkollor më të organizuar e disiplinor për nxënësit dhe stafin.

Në takim morën pjesë Burim Kryeziu, shef i Personelit në nivel komunal, Burim Sadiku, zyrtar ligjor në DKA – Gjilan, Agim Tahiri, kryetar i Këshillit Drejtues të Shkollës, Drita Maliqi, kryetare e Këshillit të Prindërve, si dhe i gjithë stafi mësimdhënës.

Gjatë diskutimeve u theksua rëndësia e bashkëpunimit mes institucioneve komunale, prindërve dhe shkollës për të garantuar një ambient të sigurt dhe funksional arsimor. Projekt-rregullorja pritet të finalizohet pas marrjes së sugjerimeve nga të gjitha palët.

Pas takimit, TV Gjilani zhvilloi një bisedë me U.D. Drejtoreshën e SHFMU “Thimi Mitko”, znj. Ardhmërie Jakupi Musliu, për detajet e kësaj nisme.

INTERVISTË ME DREJTORESHËN ARDHMËRIE JAKUPI MUSLIU

1. Çfarë rregullash të reja parashihen në këtë projekt-rregullore?

ARDHMËRIE JAKUPI MUSLIU: Projekt-rregullorja bazohet në modelin e Komunës, të cilin e kemi përshtatur sipas nevojave të shkollës. Ajo përfshin organizimin e punës, përgjegjësitë, vijueshmërinë, disiplinën dhe kodin e mirësjelljes.

2. Çfarë e shtyu shkollën “Thimi Mitko” ta marrë këtë nismë?

ARDHMËRIE JAKUPI MUSLIU: Si një nga shkollat me numrin më të madh të nxënësve dhe mësimdhënësve në Gjilan, me një staf të mrekullueshëm dhe të përkushtuar, e vlerësuam të rëndësishme të kemi rregulla të qarta dhe zbatim të ligjit.

Modelin e Komunës e përshtatëm sipas nevojave tona. Në këtë proces na mbështetën shefi i personelit, z. Burim Kryeziu, dhe zyrtari i DKA-së, z. Burim Sadiku, të cilët i falënderojmë për udhëzimet dhe bashkëpunimin.

3. Si do të përfshihen prindërit në zbatim?

ARDHMËRIE JAKUPI MUSLIU: Prindërit do të informohen dhe përfshihen përmes Këshillit të Prindërve dhe takimeve të rregullta. Bashkëpunimi shkollë–familje është thelbësor për zbatimin e rregullave dhe krijimin e një mjedisi të sigurt për nxënësit.

4. Kodi i mirësjelljes a përfshin edhe stafin dhe mësimdhënësit?

ARDHMËRIE JAKUPI MUSLIU: Po, rregullat dhe përgjegjësitë vlejnë për të gjithë komunitetin shkollor. Respekti, korrektësia dhe përgjegjësia duhet të jenë vlera të përbashkëta.

5. Kur pritet të miratohet dhe kur hyn në fuqi?

ARDHMËRIE JAKUPI MUSLIU: Pas shqyrtimit ligjor dhe përfundimit të procedurave të miratimit, do të informojmë stafin, prindërit dhe opinionin publik përmes kanaleve zyrtare të shkollës.

U.D. Drejtoreshë e SHFMU “Thimi Mitko” – Gjilan
Ardhmërie Jakupi Musliu

Intervistoi: Xhemail Veseli