EKSLUZIVE: Artistet gjilanase Arzie Jusufi & Taria Shabani fitojnë “Gold Cup” në Tajlandë, përfaqësojnë denjësisht Kosovën
Arzie Jusufi & Taria Shabani shkëlqejnë në “Thailand 1st International Tourism Folklore Festival”
Bangkok, Tajlandë – Krenari e madhe për Gjilanin dhe Kosovën! – Artistet tona Arzie Jusufi – violonçeliste dhe Taria Shabani – vokaliste kanë përfaqësuar denjësisht Republikën e Kosovës në “Thailand 1st International Tourism Folklore Festival”, i mbajtur në Samut Prakan, Bangkok.
Në këtë festival ndërkombëtar, me pjesëmarrjen e artistëve nga shumë vende të botës, dyshja nga Gjilani u vlerësua me Kupën e Artë dhe me dy medalje të bronzta.
Me një program të bazuar në melos popullor shqiptar, të interpretuar me violonçelo dhe vokal, ato emocionuan publikun oriental dhe ngritën lart emrin e Kosovës në Lindjen e Largët.
Arzie Jusufi, artiste e njohur me një elokuencë të veçantë prezantimi, tregoi për TV Gjilani për pritjen e ngrohtë që patën në festival.
“Publiku tajlandez na priti me shumë ngrohtësi, respekt dhe duartrokitje. Kënga jonë e njohur ‘Baresha’ bëri jehonë të veçantë, duke përcjellë emocion dhe bukurinë e kulturës shqiptare. Ishte krenari të shihnim se si arti ynë preku zemrat e një publiku mijëra kilometra larg Kosovës” – tha Arzie Isufi.
Ndërsa Taria Shabani vuri theksin te fuqia e muzikës si ‘gjuhë’ universale.
“Interpretimi im i këngës ‘Baresha’ bëri jehonë të madhe. Ishte një ndjenjë e papërshkrueshme të shihja se si kënga shqipe preku zemrat e publikut tajlandez. Muzika nuk njeh gjuhë e as kufi” – vlerësoi Taria.
Duke folur për përgjegjësinë e madhe që kishin, artistet theksuan rëndësinë e përfaqësimit të Kosovës në arenën ndërkombëtare.
Arzie Jusufi u shpreh:
“Kosova është e vogël në hartë, por e madhe në kulturë dhe tradita. Ishte përgjegjësi e madhe të përfaqësonim vendin tonë. Dëshmuam se kultura jonë ka vlera që meritojnë të njihen dhe të vlerësohen në mbarë botën. Për mua, si artiste nga Gjilani, ky sukses është një nder i veçantë. Të vlerësohesh me Kupën e Artë dhe dy medalje të bronzta është dëshmi se arti ynë nuk njeh kufij. Lumturia më e madhe është që pata mundësinë ta lartësoj emrin e Kosovës dhe të qytetit tim, Gjilanit”.
Taria Shabani nga ana e saj foli për emocionin e veçantë të këtij vlerësimi:
“Si vokaliste ndjeva përgjegjësi të madhe, sepse përmes zërit tim po përfaqësoja shpirtin e popullit shqiptar. ‘Baresha’ nuk ishte thjesht një këngë, por një mesazh i fuqishëm i identitetit dhe traditës sonë. Për mua, ky sukses është një nga emocionet më të mëdha të rrugëtimit tim artistik. Nga Gjilani në Tajlandë, arritëm ta bëjmë zërin e Kosovës të dëgjohet fuqishëm në skenën ndërkombëtare”.
Festivali u organizua nga IOFF – Organizata Ndërkombëtare e Festivaleve Folklorike, me drejtoreshë Krisana Cheensawat, me mbështetjen e institucioneve kryesore kulturore të Tajlandës.
