DKA në Gjilan ndjek nga afër punimet në shkolla para fillimit të vitit të ri shkollor
Drejtoria Komunale e Arsimit në Gjilan po vijon të përcjellë nga afër punimet dhe përgatitjet në institucionet arsimore të komunës, me synimin që viti i ri shkollor të nisë në kushte sa më të mira për nxënësit dhe mësimdhënësit.
Sipas njoftimit të DKA-së, aktualisht punime të rëndësishme po zhvillohen në SHMU “Themi Mitko” dhe SHMU “Nazim Hikmet”, ku po punohet në përmirësimin, rregullimin dhe funksionalizimin e hapësirave shkollore.
Ndërhyrje të ndryshme infrastrukturore, sipas DKA-së, po realizohen edhe në institucione të tjera arsimore në Komunën e Gjilanit, si pjesë e përgatitjeve për fillimin e vitit të ri shkollor.
“Përgatitja dhe përmirësimi i infrastrukturës shkollore mbetet një nga prioritetet tona, sepse një ambient i sigurt, funksional dhe i përshtatshëm është parakusht për një fillim të mbarë të vitit shkollor dhe për krijimin e kushteve sa më të mira për procesin mësimor”, thuhet në njoftimin e Drejtorisë Komunale të Arsimit.
Nga DKA bëjnë të ditur se mbetet e përkushtuar që, në bashkëpunim me drejtoritë e shkollave dhe institucionet komunale, të përfundojë punimet e planifikuara dhe të sigurojë kushtet e nevojshme për një fillim sa më të mirë të vitit të ri shkollor.
“Vazhdojmë me punë, përgjegjësi dhe përkushtim për një arsim më të mirë në Gjilan!”, përfundon njoftimi i DKA-së.
