Zyrtare: Veton Tusha transferohet te Celje, firmos deri në vitin 2029
Një tjetër futbollist i rëndësishëm largohet nga kampionia e Kosovës për një aventurë të re në futbollin evropian.
Klubi kampion i Sllovenisë, Celje, ka zyrtarizuar transferimin e anësorit kosovar Veton Tusha nga FC Drita.
23-vjeçari ka nënshkruar kontratë afatgjatë, e vlefshme deri më 30 qershor 2029, ndërsa marrëveshja është arritur mes dy klubeve kampione të Kosovës dhe Sllovenisë.
Në njoftimin zyrtar, Celje vlerësoi paraqitjet e Tushës në përballjet ndaj Dritës në eliminatoret e Ligës së Konferencës, duke theksuar se shpejtësia, depërtimet dhe cilësitë e tij në fazën sulmuese lanë përshtypje të mëdha dhe krijuan shumë vështirësi për mbrojtjen sllovene.
Tusha ishte një nga futbollistët më të rëndësishëm të Dritës në dy sezonet e fundit, duke kontribuar në fitimin e dy titujve radhazi të kampionit të Kosovës.
Karrierën e nisi në Kaçanik, për të vazhduar te Vardari dhe më pas në Turqi, ku me Denizlisporin spikati që në moshë të re. Më vonë luajti edhe në Poloni me Termalicën, ndërsa pas rikthimit në Kosovë fitoi dy tituj kampioni me Ballkanin dhe pati një periudhë edhe te Dinamo City në Shqipëri.
Gjatë dy sezoneve të fundit me Dritën, Veton Tusha regjistroi 16 gola dhe 6 asistime, statistika që bindën kampionin slloven të investojë në shërbimet e tij.
FC Drita humbet një prej lojtarëve të saj më të rëndësishëm, ndërsa futbolli kosovar fiton edhe një tjetër ambasador në arenën ndërkombëtare.
Suksese, Veton Tusha!
