Kandidatja për anëtare të KGJK-së, Gentiana Haziri, merr 11 vota, të pamjaftueshme për vazhdimin e procedurës zgjedhore
GJILAN – Ka përfunduar procesi zgjedhor për përzgjedhjen e kandidatit të vetënominuar për anëtar të Këshillit Gjyqësor të Kosovës (KGJK) nga radhët e gjyqtarëve të Gjykatës Themelore në Gjilan.
Procesi është administruar nga Komisioni i emëruar nga Këshilli Gjyqësor i Kosovës, i kryesuar nga Ahmet Imami, me anëtarë Afërdita Bytyçi dhe Fahret Vellija.
Në garë ishte gjyqtarja Gentiana Shabani–Haziri, e cila ishte kandidatja e vetme e vetënominuar në këtë proces. Të drejtë vote kishin 34 gjyqtarë, ndërsa në votim morën pjesë 31 prej tyre.
Pas numërimit të votave, Komisioni konstatoi se kandidatja kishte marrë 11 vota, rezultat që nuk ishte i mjaftueshëm për vazhdimin e procedurës në fazën e radhës. Gjithsej u regjistruan 31 vota të vlefshme, ndërsa nuk pati asnjë votë të pavlefshme.
Procesi zgjedhor u monitorua edhe nga Misioni i Bashkimit Evropian për Sundimin e Ligjit në Kosovë (EULEX).
