Poeti dhe artisti italian Raffaele Icaruso nderon dëshmorët dhe luftëtarët e UÇK-së
PRIZREN – Në kuadër të aktiviteteve të Festivalit Ndërkombëtar të Poezisë “Drini Poetik”, poeti dhe artisti italian Raffaele Icaruso bëri homazhe dhe shprehu respektin e tij për dëshmorët dhe luftëtarët e Ushtrisë Çlirimtare të Kosovës.
Me një tufë lulesh në duar, Icaruso vizitoi vendet përkujtimore, duke nderuar sakrificën e atyre që dhanë jetën për lirinë e Kosovës. Ky gjest simbolik u vlerësua si një shprehje e respektit dhe solidaritetit ndërkombëtar ndaj historisë së popullit të Kosovës dhe rrugës së tij drejt lirisë.
Aktiviteti u zhvillua në kuadër të Festivalit Ndërkombëtar të Poezisë “Drini Poetik”, i cili ka mbledhur në Kosovë poetë, shkrimtarë dhe artistë nga vende të ndryshme të botës, duke promovuar dialogun kulturor, vlerat universale të artit dhe miqësinë ndërmjet popujve.
Kryetari i Lidhjes së Shkrimtarëve të Kosovës, Shyqri Galica, ka bërë të ditur se pjesëmarrja e krijuesve të huaj në aktivitete të tilla, përveç dimensionit kulturor, bart edhe mesazhe respekti për historinë, sakrificën dhe vlerat e lirisë së Kosovës.
Festivali “Drini Poetik” vazhdon me aktivitete letrare, promovime, takime poetike dhe manifestime kulturore në disa qytete shqiptare, duke sjellë pranë publikut krijues të njohur nga vende të ndryshme të botës.
