Gjilan: Tri veprimtari për 81-vjetorin e lindjes dhe 30-vjetorin e amshimit të Beqir Musliut
GJILAN – Në shenjë nderimi për jetën dhe veprën e njërit prej emrave më të rëndësishëm të letërsisë shqiptare, Beqir Musliu, në Gjilan do të organizohen disa veprimtari letrare e përkujtimore me rastin e 81-vjetorit të lindjes së tij, i cili këtë vit përkon edhe me 30-vjetorin e ndarjes së tij nga jeta.
Asociacioni Alternativ i Shkrimtarëve të Kosovës – Ars Clubi “Beqir Musliu”, nesër, më 11 qershor, në orën 11:00, do të vendosë lule pranë varrit të shkrimtarit në Varrezat e Qytetit në Gjilan, duke e kujtuar simbolikisht ditëlindjen e tij të 81-të.
Aktivitetet përkujtimore do të vazhdojnë më 13 qershor, në Bibliotekën e Qytetit “Fan S. Noli”, ku nga ora 12:00 do të promovohet numri më i ri i revistës letrare “Agmia”, i kushtuar tërësisht Beqir Musliut. Në këtë botim janë përfshirë materiale nga tryeza letrare e manifestimit “Flaka e Janarit”, si dhe studime e shkrime të tjera që trajtojnë krijimtarinë dhe trashëgiminë e tij letrare.
Ndërkaq, më 20 qershor, po në Bibliotekën “Fan S. Noli”, duke filluar nga ora 12:00, do të përurohet vepra më e re studimore e autorit Shefqet Dibrani, me titull “Artistikja në veprën ‘Orfeiana’ të Beqir Musliut”, e botuar së fundmi nga Shtëpia Botuese “Beqir Musliu”.
Të dyja veprimtaritë letrare organizohen në bashkëpunim me Bibliotekën e Qytetit “Fan S. Noli” në Gjilan.
Organizatorët kanë ftuar krijuesit, studiuesit, artdashësit dhe qytetarët që të marrin pjesë në këto aktivitete, të cilat synojnë të kujtojnë dhe të vlerësojnë kontributin e jashtëzakonshëm që Beqir Musliu ka dhënë në letërsinë dhe kulturën shqiptare.
Portreti i Beqir Musliut, i përdorur në materialet promovuese të këtyre veprimtarive, është punuar nga piktori i njohur Demush R. Avdimetaj.
