Nis rehabilitimi i rrugës Kolloleq – Dajkoc – Muçivërc, investim prej 1.3 milion eurosh
KAMENICË – Ka nisur realizimi i një prej projekteve më të rëndësishme infrastrukturore në Komunën e Kamenicës, rehabilitimi i rrugës lokale Kolloleq – Dajkoc – Muçivërc, me një vlerë investimi prej rreth 1.3 milion eurosh.
Punimet kanë filluar këto ditë dhe përfshijnë rregullimin e një segmenti rrugor që lidh disa vendbanime të Karadakut, duke përmirësuar ndjeshëm kushtet e qarkullimit për banorët e zonës.
Sipas kryetarit të Komunës së Kamenicës, Kadri Rahimaj, ky investim do të ndikojë drejtpërdrejt në rritjen e sigurisë në trafik, lehtësimin e lëvizjes së qytetarëve dhe përmirësimin e lidhjeve ndërmjet fshatrave të kësaj ane.
“Ka filluar rehabilitimi i rrugës Kolloleq – Dajkoc – Muçivërc, një projekt me vlerë prej 1.3 milion eurosh që do të lehtësojë qarkullimin dhe do të rrisë sigurinë për të gjithë banorët”, ka bërë të ditur Rahimaj.
Rruga që po rehabilitohet shtrihet në një gjatësi prej disa kilometrash dhe konsiderohet arterie e rëndësishme lokale për banorët e Kolloleqit, Dajkocit dhe Muçivërcit, të cilët prej vitesh kanë kërkuar investime në infrastrukturën rrugore.
Kryetari Rahimaj ka falënderuar gjithashtu Qeverinë e Kosovës për mbështetjen financiare të këtij projekti, duke theksuar se investimet në infrastrukturë mbeten ndër prioritetet kryesore për zhvillimin e Kamenicës.
Banorët e zonës pritet të përfitojnë nga një qarkullim më i sigurt, qasje më e lehtë në shërbime dhe kushte më të mira për zhvillimin ekonomik e social të vendbanimeve përgjatë kësaj rruge.
