Kurti voton në Prishtinë, fton qytetarët të dalin në zgjedhje

Kryeministri në detyrë, Albin Kurti, ka ushtruar të drejtën e votës në Fakultetin Juridik në Prishtinë, në kuadër të zgjedhjeve parlamentare që po mbahen sot në Kosovë.

Pas votimit, Kurti u bëri thirrje qytetarëve që të marrin pjesë në procesin zgjedhor dhe të shfrytëzojnë të drejtën e tyre demokratike për të votuar.

“Sot është një ditë e bukur dhe e rëndësishme, e diel me diell. Ftoj qytetarët që paraprakisht ta kontrollojnë vendvotimin dhe, pasi ta verifikojnë, të nisen për të votuar. Sot vendosin ata që votojnë, prandaj u bëj thirrje qytetarëve që ta përdorin mundësinë qytetare për t’u përcaktuar për përbërjen e ardhshme parlamentare”, deklaroi Kurti.

Procesi i votimit po vazhdon në të gjitha komunat e Kosovës, ndërsa institucionet zgjedhore po monitorojnë mbarëvajtjen e procesit.