Ndjekje me rrotacion në Kamenicë, përfundon në shkurre pas ikjes nga Policia
Një ngjarje e tensionuar ka ndodhur mbrëmjen e së shtunës në Kamenicë, ku një person i maskuar ka tentuar t’i ikë Policisë me motoçikletë, ndërsa ndjekja ka përfunduar me aksidentim dhe sulm ndaj një zyrtari policor, raportojnë mediat.
Sipas burimeve mediale, rasti ka ndodhur rreth orës 19:50, kur një patrullë policore kishte vërejtur një motoçikletë me një person të maskuar, i cili nuk iu bind urdhrave për ndalim.
I dyshuari dyshohet se ka nisur arratisjen me shpejtësi në drejtim të disa fshatrave të zonës, ndërsa Policia është vënë menjëherë në ndjekje me rrotacion.
Pas disa minutash ndjekje, motoçiklisti humbi kontrollin mbi mjetin dhe përfundoi jashtë rruge, në shkurre, afër një restoranti në zonë.
Burimet bëjnë të ditur se në momentin kur zyrtari policor iu afrua për ta neutralizuar, i dyshuari reagoi me dhunë fizike, duke e goditur policin me duar dhe këmbë.
Si pasojë, polici ka pësuar lëndime trupore dhe ka marrë trajtim mjekësor, ndërsa i dyshuari ka kaluar me lëndime më të lehta.
Me vendim të Prokurorit të Shtetit, rasti është iniciuar si “Sulm ndaj personit zyrtar” dhe hetimet janë duke vazhduar.
