KQZ zyrtarizon afatet: Fushata për zgjedhjet e 7 qershorit zgjat 10 ditë e 7 orë, fillon më 28 maj
Komisioni Qendror i Zgjedhjeve ka caktuar zyrtarisht kohëzgjatjen e fushatës zgjedhore për zgjedhjet e parakohshme parlamentare të 7 qershorit 2026.
Me 10 vota për, asnjë kundër dhe asnjë abstenim, KQZ-ja vendosi që fushata të zgjasë 10 ditë e 7 orë. Ajo fillon më 28 maj 2026 dhe përfundon më 7 qershor 2026, në orën 06:59.
Vendimi u mor në mbledhjen e sotme, ku KQZ-ja miratoi edhe planin e aktiviteteve për organizimin e zgjedhjeve të parakohshme për Kuvendin e Kosovës.
Plani përfshin afatet për: deklarimin e partive për pjesëmarrje dhe koalicione, certifikimin e subjekteve politike, dorëzimin dhe verifikimin e listave të kandidatëve, caktimin e qendrave të votimit brenda vendit dhe në përfaqësi diplomatike, regjistrimin e votuesve, votimin përmes postës, certifikimin e listës së votuesve, akreditimin e vëzhguesve dhe mediave, si dhe emërimin e anëtarëve të 38 Komisioneve Komunale të Zgjedhjeve dhe këshillave të vendvotimeve.
Afatet kryesore sipas anëtarit të KQZ-së, Alban Krasniqi:
- Regjistrimi i votuesve jashtë Kosovës: 6 maj – 17 maj 2026
- Certifikimi i listës së votuesve: 20 maj – 21 maj 2026
- Votimi përmes postës: 25 maj – 6 qershor 2026
- Fushata zgjedhore: 28 maj – 7 qershor 2026, ora 06:59
- Regjistrimi i personave me nevoja të veçanta: 22 maj – 31 maj 2026
- Emërimi i këshillave të vendvotimeve: deri më 22 maj 2026
- Emërimi i këshillave në përfaqësi diplomatike: deri më 30 maj 2026
- Emërimi i ekipeve të numërimit në QKN: deri më 22 maj 2026
- Akreditimi i vëzhguesve: 8 maj – 30 maj 2026
- Fushata për edukim dhe informim publik: 1 maj – 27 maj 2026
- Trajnimi i këshillave të vendvotimit: 27 maj – 5 qershor 2026
- Trajnimi i ekipeve të numërimit: 4 qershor – 5 qershor 2026
Krasniqi theksoi se KQZ-ja ka nxjerrë një rregullore të re për vëzhgimin e zgjedhjeve, e cila është publikuar në faqen zyrtare të institucionit. Ai u bëri thirrje mediave dhe vëzhguesve ta lexojnë për t’u njohur me procedurat, të drejtat dhe detyrimet.
“Këto janë afatet kryesore. Plani i detajuar përshkruan të gjitha detyrat, përgjegjësitë dhe afatet kohore. Si Këshill i Operacioneve Zgjedhore, e rekomandojmë për miratim nga KQZ-ja,” tha Krasniqi.
