FSK në mision të ri ndërkombëtar: ekip zbulues në Gaza për përgatitjen e dislokimit paqeruajtës
Një ekip i Forcës së Sigurisë së Kosovës (FSK) ka udhëtuar drejt Gazës për të realizuar rikonicionin e zonës ku pritet të dislokohen trupat e saj në kuadër të një misioni paqeruajtës ndërkombëtar.
Sipas burimeve zyrtare, komandanti i FSK-së, Gjenerallejtënant Bashkim Jashari, ka dërguar ekipin për vlerësimin paraprak të terrenit dhe për koordinimin e aktiviteteve që lidhen me dislokimin e kontingjentit të FSK-së në kuadër të Forcave Stabilizuese Ndërkombëtare (ISF).
Gjatë vizitës, delegacioni ka zhvilluar takime me autoritetet përgjegjëse për administrimin e Gazës, si dhe me përfaqësues të Qendrës Koordinuese Civilo-Ushtarake (CMCC), e cila vepron nën mbikëqyrjen e Bordit të Paqes në përputhje me Rezolutën 2803 të Kombeve të Bashkuara.
Në këto takime është diskutuar procesi i integrimit të kontingjentit të FSK-së, mënyra e zhvillimit të operacioneve të përbashkëta, si dhe koordinimi i mbështetjes logjistike në terren.
FSK ka ritheksuar përkushtimin e saj për të kontribuar në paqe dhe stabilitet global, në bashkëpunim me aleatët ndërkombëtarë, përfshirë Shtetet e Bashkuara të Amerikës, duke forcuar partneritetet strategjike dhe duke vepruar në përputhje me standardet ndërkombëtare të sigurisë dhe paqeruajtjes.
