Maturantët e Kamenicës mirëpresin Universitetin Publik “Kadri Zeka” në një takim informues për orientim akademik
Maturantët e Komunës së Kamenicës kanë mirëpritur përfaqësues të Universitetit Publik “Kadri Zeka” në një takim informues, i cili kishte për qëllim orientimin e tyre drejt zgjedhjeve të ardhshme akademike dhe profesionale pas përfundimit të shkollimit të mesëm.
Në këtë aktivitet morën pjesë maturantët e Shkollës së Mesme të Lartë Mikse “Sejdi Kryeziu” në Roganë, si dhe nxënësit e Shkollës së Mesme “Andrea Durrsaku” dhe Gjimnazit “Ismail Qemali” në Kamenicë.
Të shoqëruar nga mësimdhënësit e tyre, nxënësit patën mundësinë të informohen nga përfaqësues të Universitetit Publik “Kadri Zeka”, përfshirë Prodekanin e Fakultetit të Shkencave Sociale, Prof. Ass. Dr. Blerim Haziri, sekretarin e njësisë Petrit Canaj, si dhe Prof. Ass. Dr. Avni Rudaku. Gjatë prezantimit u paraqit oferta akademike e universitetit, programet e studimit, kushtet e regjistrimit dhe mundësitë e zhvillimit profesional që ofron institucioni.
Në bashkëbisedim me maturantët, përfaqësuesit e universitetit theksuan rëndësinë e zgjedhjes së drejtimit të duhur studimor, duke i inkurajuar nxënësit të ndjekin interesat dhe prirjet e tyre personale në formësimin e karrierës së ardhshme. Po ashtu, u ofruan informacione të detajuara mbi procedurat e regjistrimit, përfitimet për studentët dhe perspektivat e punësimit pas përfundimit të studimeve.
Një pjesë e veçantë e takimit iu kushtua diskutimit të hapur me maturantët, të cilët shfaqën interesim të madh dhe parashtruan pyetje lidhur me programet studimore, praktikat profesionale dhe mundësitë e avancimit në karrierë. Përfaqësuesit e universitetit iu përgjigjën pyetjeve të tyre dhe ndanë këshilla praktike për hapat e mëtejshëm akademikë.
Në përmbyllje të vizitës, maturantët shprehën mirënjohjen e tyre për përfaqësuesit e Universitetit Publik “Kadri Zeka”, duke e vlerësuar takimin si të dobishëm dhe motivues për orientimin e tyre në rrugëtimin e ardhshëm akademik.
